भेनेजुएलाकी विपक्षी नेता मारिया कोरिना मचाडो यस वर्षको नोबेल शान्ति पुरस्कार लिन नर्वेको राजधानी ओस्लो जान डुंगा चढेर गोप्य रूपमा देश छोडेको खुलेको छ।
अमेरिकी पत्रिका द वाल स्ट्रिट जर्नलका अनुसार मचाडो मंगलबार भेनेजुएलाबाट डुंगा चढेर क्यारिबियनमा रहेको नेदरलेन्ड्सको टापु कुराकाओतर्फ प्रस्थान गरिन्। उनलाई भेनेजुएला छोड्न निकोलस मदुरो सरकारका केही अधिकारीहरूले सहयोग गरेको भनेर ब्लुमबर्गले जनाएको छ।
मदुरो सरकारले पक्रिने डरले ११ महिनादेखि सार्वजनिक रूपमा देखा नपरेकी मचाडो बुधबार ओस्लोमा भएको पुरस्कार हस्तान्तरण समारोहमा भने उपस्थित हुन सकिनन्। उनको अनुपस्थितिमा उनकी छोरी अना कोरिना सोसाले पुरस्कार थापिन्।
खराब मौसमका कारण मचाडोलाई बोकेको डुंगा भेनेजुएलाबाट करिब ६५ किलोमिटर टाढा रहेको कुराकाओ अपेक्षित समयमा पुग्न नसकेकाले उनी बुधबार राति मात्रै ओस्लो पुगिन्।
५८ वर्षीया मचाडो भेनेजुएलाकी प्रमुख विपक्षी नेता हुन्। मदुरोको तानाशाही सरकारले उनलाई गत वर्ष भएको राष्ट्रपतीय निर्वाचन लड्न नदिएपछि उनकै पहलमा एडमुण्डो गोन्जालेजलाई विपक्षीले साझा उम्मेदवार उठाएका थिए।
गोन्जालेजले सो निर्वाचन जिते पनि मदुरोले धाँधली गरेर आफैलाई विजयी घोषणा गरेका थिए। गोन्जालेजको निर्वाचनमा राम्रो प्रदर्शनको श्रेय मचाडोलाई नै दिइन्छ।
स्वीडेनका वैज्ञानिक अल्फ्रेड नोबेलको नाममा विभिन्न विधामा दिइने नोबेल पुरस्कार स्वीडेनमा रहेको नोबेल फाउन्डेसनले दिन्छ।
नोबेल शान्ति पुरस्कार विजेताको छनोट भने नर्वेली नोबेल समितिले गर्छ। सो समितिमा नर्वेली संसदले सिफारिस गरेका पाँच सदस्य हुन्छन्।
अमेरिकी राष्ट्रपति डोनाल्ड ट्रम्पले आफूलाई सो पुरस्कार दिन नर्वेको सरकारलाई दबाब दिए पनि सो समितिले मचाडोलाई दिने घोषणा गरेको थियो। सो पुरस्कार लिन मचाडो गोप्य रूपमा डुंगा चढेर भेनेजुएला छोडेकी हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1763886130.jpeg)
-1746009348.jpg)
