युरोपेली विमान निर्माता एयरबस कम्पनीका प्रमुख कार्यकारी अधिकृत (सिइओ) गिउम फउरीले आगामी ३०-४० वर्षमा यात्रुवाहक विमान बी–२ बमवर्षक विमान जस्तै हुने बताएका छन्।
जर्मनीको अखबार बिल्डसँगको अन्तर्वार्तामा फउरीले भविष्यमा यात्रुवाहक विमान केटाकेटीले कागज पट्टयाएर बनाउने त्रिकोणात्मक हवाईजहाज जस्तै हुने जनाएका हुन्।
बी–२ बमवर्षक विमान जस्तो त्रिकोणात्मक आकारका विमानलाई 'ब्लेन्डेड-विङ बडी' भनिन्छ।
गत जुनमा अमेरिकाले इरानका आणविक भट्टीहरूमा आक्रमण गर्न प्रयोग गरेको बी–२ बमवर्षक विमान अहिले उपलब्ध सबैभन्दा उत्कृष्ट 'ब्लेन्डेड-विङ बडी' विमान हो।
अहिले प्रचलनमा रहेका परम्परागत 'ट्युब-एन्ड-विङ' यात्रुवाहक विमानभन्दा 'ब्लेन्डेड-विङ बडी' विमानको भार बहन क्षमता बढी भएकाले इन्धनका हिसाबले किफायती र वातावरण मैत्री हुन्छ। त्यसैले धेरै यात्रु बोक्ने वाइडबडी विमान भन्दा 'ब्लेन्डेड-विङ बडी' विमान उत्कृष्ट हुने उनले बताए।
तर 'ब्लेन्डेड-विङ बडी' विमानको केही बेफाइदाहरू पनि उनले औंल्याए।
यी विमानमा अहिलेको जति झ्याल हुने छैनन्। त्यसैले यात्रुहरूले कुनै प्राकृतिक प्रकाश पाउने छैनन्। कतिपय यात्रुहरू अल्मलिने वा थुनिएर निस्सासिए जस्तो (क्लास्ट्रोफोबिया) महसुस गर्न सक्छन्।
त्यस्तै ती विमानमा आकस्मिक उद्धार पनि चुनौतीपूर्ण हुनेछ। झ्याल नभएकाले यात्रु र चालक दलले बाहिर के भइरहेको छ भनेर देख्ने छैनन्।
त्यस्तै, ती विमानको बीचमा बस्ने यात्रुहरूलाई आपतकालीन अवस्थामा बाहिर निस्कन अहिलेका विमानहरूमा भन्दा धेरै समय लाग्नेछ।
एयरबस र उसको अमेरिकी प्रतिद्वन्द्वी बोइङ दुवै कम्पनीले 'ब्लेन्डेड-विङ बडी' यात्रुवाहक विमान बनाउन प्रयत्न गरिरहेका छन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1763886130.jpeg)
-1746009348.jpg)
