एमाले नेता शान्ता चौधरीको सुर्खेतस्थित अचार बिक्री केन्द्रमा आगजनी भएको घटनामा एक जना पक्राउ परेका छन्।
पक्राउ पर्नेमा वीरेन्द्रनगर नगरपालिका–८ का २८ वर्षीय दीपक कँडेल छन्।
कात्तिक ३० गते बिहान आगलागी भएपछि फरार रहेका कँडेललाई मंगलबार पक्राउ गरिएको जिल्ला प्रहरी कार्यालय सुर्खेतका डिएसपी मोहनजंग बुढथापाले जानकारी दिए।
वीरेन्द्रनगर नगरपालिका-६ सनिहलमा रहेको सुर्खेत मार्केटमा रहेको अचार बिक्री केन्द्र र एउटा कपडा पसल जलेर नष्ट भएको थियो।
आगलागी नवदुर्गा बेबीसप नाम रहेको कपडाको पसलबाट सुरू भएको थियो। कपडा पसल वीरेन्द्रनगर – ६ की जुनाकुमारी बुढाको हो।
आगलागीबाट उक्त कपडा पसल पूर्ण रुपमा जलेर नष्ट भएको थियो।
जुनाकुमारी दीपकका भाउजु हुन्।
पक्राउ परेपछि उनले अंश बन्डामा चित्त नबुझेपछि आगो लगाएको बताएको डिएसपी बुढथापाले जानकारी दिए।
‘मलाई दाजु भाउजुले अंश बण्डामा ठगे। त्यही भएर पसलमा गइ पेट्रोल छर्केर आगो लगाएको हुँ,’ दीपकको भनाइ उद्धृत गर्दै डिएसपी बुढथापाले भने।
त्यहीँबाट सुरू भएको आगलागीले एमाले नेता शान्ता चौधरीको अचार बिक्री केन्द्र पनि जलेर नष्ट भएको थियो।
अचार पसलको रेखदेख दैलेखको भगवती माइ गाउँपालिका – ६ की खगीसरा बुढा रोकायाले गर्दै आएकी थिइन्।
अनुसन्धानबाट दीपक विगतमा पनि लागु औषध मुद्दामा पक्राउ परेको खुलेको डिएसपी बुढथापाले जानकारी दिए।
खोजी गर्दै जाने क्रममा प्रहरीले मंगलबार दीपकलाई नियन्त्रणमा लिएपछि उनले आफैले भाउजुको पसलमा आगजनी गरेको स्वीकारेका छन्।
'पाउनु पर्ने अंश पाइन। त्यति बराबरको उनीहरूको नोक्सान होस् भनेर आगो लगाइदिएको हुँ,' उनले प्रहरीसँग बयानमा भनेका छन्।
आगजनी बाट दुई पसलमा गरि कति क्षति भयो भन्ने विवरण संकलन कार्य जारी रहेको प्रहरीले जानकारी दिएको छ ।
एमाले नेतृ शान्ताले भने आफ्नो अचार पसलमा भएको आगजनी बाट झन्डै ३० लाख बराबर क्षति भएको दाबी गरेकी छन् ।
घटना बारे थप अनुसन्धान भइरहेको डिएसपी बुढथापाले जानकारी दिए।
-1746009348.jpg)
