गुन्डागर्दीमा संलग्न रहेको आरोपमा लामो समयदेखि फरार रहँदै आएका दुई जना पक्राउ परेका छन्।
पक्राउ पर्नेमा नेपालगञ्ज उपमहानगरपालिका–१८ का विनय भण्डारी र राप्ती सोनारी गाउँपालिका–२ का समिर भनिने सरोज विक्रम विष्ट छन्।
विनयलाई कात्तिक ३० गते बाँके प्रहरीले नेपालगञ्ज–१ बाट पक्राउ गरेको हो। सरोजलाई भने मंसिर २ गते पक्राउ गरेको हो।
विनयसहित सात/ आठ जनाको समूहले एक युवकमाथि गत वैशाख १३ गते नेपालगञ्ज– १८ कारकाँदोस्थित सुर्खेत रोडमा ज्यान मार्ने उद्देश्यसहित एक युवकमाथि धारिलो हतियार प्रहार गरी गम्भीर घाइते बनाएका थिए।
सो घटनामा विनय र उनको समूह विरूद्ध जिल्ला प्रहरी कार्यालयमा ज्यान मार्ने उद्योग अन्तरगतको मुद्दा थियो। त्यतिखेर सो समूहका अन्य केही पक्राउ परे पनि विनय भने फरार सूचीमा थिए।
विनय विरूद्ध २०७३/११/२४ गते सवारी ज्यान सम्बन्धी मुद्दा चलेको थियो। त्यस्तै २०७८/१०/१४ गते जिल्ला प्रहरी कार्यालय बाँकेमा भण्डारीका विरूद्ध डाँका चोरी शीर्षकमा मुद्दा चलेको थियो। २०७९/०९/१८ गते भण्डारी विरूद्ध जिप्रका बाँकेमा ज्यान मार्ने उद्योग अन्तरगतको मुद्दा चलेको थियो।
त्यस्तै, प्रहरीका अनुसार सरोज सहित तीन जनाको समूहले ज्यान मार्ने उद्देश्य राखी एक जना व्यक्तिमाथि खुकुरी प्रहार गरी गम्भीर घाइते तुल्याएको प्रहरी बताउँछ।
सरोजका विरूद्ध जिल्ला प्रहरी कार्यालय बाँकेमा ज्यान मार्ने उद्योग शीर्षकमा २०८१/१२/१९ गते मुद्दा दर्ता भएको थियो। जिल्ला अदालतबाट पक्राउ पुर्जी जारी भएपछि उनी फरार भएका थिए। उनी मंगलबार नेपालगञ्ज– १२ बाट पक्राउ परेका थिए।
एसपी अंगुर जिसीका अनुसार सरोज विरूद्ध यसअघि २०७६/०३/०६ मा, २०७७/०४/०२ मा, २०७७/१०/०७ मा, २०८०/१२/२० मा र पछिल्लो समय २०८१/०३/१८ गते सहित पाँच पटक प्रहरीमा ज्यान मार्ने उद्योग शीर्षकमा मुद्दा परेका थिए। त्यस्तै सरोज विरूद्ध २०७६/१०/०२ गते इलाका प्रहरी कार्यालय कोहलपुरमा सार्वजनिक सम्पत्ति तोडफोड शीर्षकमा मुद्दा परेको थियो।
पछिल्लो समय पक्राउ परेका भण्डारी र विष्ट दुबै जनालाई आवश्यक कारबाहीका लागि जिल्ला अदालत बाँकेमा पेस गरिएको प्रहरीले जानकारी दिएको छ।
दुबै जनाका विरूद्ध अदालतमा थुनछेक बहस सुरू हुँदैछ।
-1746009348.jpg)
