मुम्बईको वसईमा १३ वर्षीया छात्राको मृत्यु भएपछि ठूलो विवाद उत्पन्न भएको छ।
विद्यालयमा ढिलो आएको भन्दै सय पटक उठबस गर्न लगाइएपछि उनको स्वास्थ्य एकाएक बिग्रिएको र त्यसपछि ज्यान गएको परिवारको आरोप छ।
अन्तर्राष्ट्रिय समाचार संस्था 'बिबिसी' का अनुसार विद्यालयकी एक महिला शिक्षकले ढिलो आएका छात्र–छात्रालाई सय पटक उठबसको सजा दिएकी थिइन्। त्यही सजाय पाएपछि ती छात्राको अवस्था बिग्रँदै गएर नोभेम्बर १४ को रात जेजे अस्पतालमा मृत्यु भएको बिबिसीले जनाएको छ।
मृत छात्रा वसई पूर्वको सातीवली क्षेत्रको एक विद्यालयमा कक्षा ६ मा पढ्थिन्। विद्यालयमा कक्षा १ देखि ८ सम्मका विद्यार्थी अध्ययन गर्छन्।
नोभेम्बर ८ को बिहान करिब ५० विद्यार्थी ढिला आएका थिए, जसमा ती छात्रा पनि थिइन्। केही विद्यार्थीले झोला काँधमै राखेर उठबस गरेका थिए।
त्यस दिन विद्यालयबाट घर फर्किएपछि ती छात्राको अवस्था बिग्रियो।
उनलाई पहिले वसईको आस्था अस्पताल, त्यसपछि अर्को अस्पताल हुँदै मुम्बईको जेजे अस्पताल लगिएको थियो।
अन्ततः नोभेम्बर १४ को रात ११ बजे उपचारकै क्रममा उनको मृत्यु भएको हो।
वसई थानाका वरिष्ठ निरीक्षक दिलीप घुगेका अनुसार ढिलो आएका विद्यार्थीलाई १०० पटक उठबस गराइएको थियो। घर पुगेपछि ती छात्राले खुट्टा दुखेको गुनासो गरिन्।
प्रहरीले दुर्घटनाबाट मृत्यु भएको भनी रिपोर्ट दर्ता गरेको छ र पोस्टमार्टम रिपोर्टको प्रतीक्षामा छ। प्रारम्भिक मेडिकल रिपोर्टले छात्राको हेमोग्लोबिन ४ देखाएको छ, जुन अत्यन्तै कम मानिन्छ।
यो घटनामा विद्यालयविरूद्ध छानबिन समिति गठन गरिएको छ।
प्राथमिक शिक्षा अधिकारी सोनाली मातेकरले यसरी सजाय दिनु शिक्षा अधिकार ऐनको उल्लंघन भएको बिबिसीलाई बताएकी छन्।
दोष प्रमाणित भए विद्यालय र शिक्षक दुवैविरूद्ध कारबाही हुनेछ।
उनका अनुसार बालिकाको मृत्यु उठबसकै कारण भएको हो कि होइन भन्ने चिकित्सकीय तथ्यबाट मात्र पुष्टि हुनेछ।
-1746009348.jpg)
