रूससँग युद्ध लडिरहेको युक्रेनलाई फ्रान्सले १०० वटासम्म रफाल लडाकू विमान बेच्ने भएको छ।
अमेरिकी राष्ट्रपति डोनाल्ड ट्रम्पले युक्रेनलाई सैन्य सहायता घटाएपछि युरोपेली राष्ट्रहरूले युक्रेनलाई दिने सहायता बढाउँदै आएका छन्। त्यसकै अनुसार फ्रान्सले युक्रेनलाई १०० वटासम्म रफाल लडाकू विमान बेच्ने प्रतिबद्धता जनाएको द न्यू योर्क टाइम्सले लेखेको छ।
फ्रान्स भ्रमणमा रहेका युक्रेनी राष्ट्रपति भोलोदिमिर जेलेन्स्कीको फ्रान्सका राष्ट्रपति इमानुअल म्याक्रोनसँग भेट भएपछि सो कुराको खुलासा भएको हो।
यी लडाकू विमान र अन्य सैन्य सामग्री सन् २०३५ सम्ममा बेच्ने भएकाले यसले रूससँगको युद्धमा तत्काल फरक भने नपार्ने देखिन्छ।
केही हप्ताअघि मात्रै स्वीडेन पनि युक्रेनलाई १५० वटासम्म लडाक विमान बेच्न सहमत भएको थियो। त्यसपछि फ्रान्स पनि रफाल लडाकू विमान बेच्न सहमत भएकाले रूसबाट युक्रेनलाई जोगाउन युरोपेली देशहरू दृढ रहेको देखिन्छ।
फ्रान्समा रहेका जेलेन्स्कीले सामाजिक सञ्जालमा लेख्दै यो सम्झौता दुवै राष्ट्रका लागि साँच्चै ऐतिहासिक भएको बताएका छन्।
अर्कातिर, म्याक्रोंले पनि सो सम्झौतालाई फ्रान्सेली र युक्रेनी रक्षा उद्योगहरूलाई नजिक ल्याउने दिशामा एउटा महत्त्वपूर्ण कदम भनेका छन्।
ट्रम्पले रूस र युक्रेनको युद्ध रोक्न पहल गरे पनि रूसी राष्ट्रपति भ्लादिमिर पुटिनले युद्ध रोक्न कुनै चासो देखाएका छैनन्। त्यसपछि ट्रम्पले युक्रेनलाई अमेरिकी हतियार आपूर्ति गर्न थालेका छन्। तर ती हतियार अमेरिकाले सित्तैमा नदिएर युरोपेली देशहरूले अमेरिकासँग किनेर दिनुपर्ने भनेका छन्।
अमेरिकी हतियार मात्रै किन्नुभन्दा आफ्नै देशमा बनेका हतियार पनि बेच्दा केही सस्तो पर्ने र आफ्ना हतियार निर्मातालाई पनि फाइदा हुने भएकाले युरोपेली देशले युक्रेनलाई हतियार बेच्न थालेका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
