डिम्ब किनबेच गर्नेमाथि मुद्दा नचलाउने निर्णय गरेको भन्दै महान्यायाधिवक्ता सबिता भण्डारी बरालविरूद्ध परेको रिटमाथि सर्वोच्च अदालतमा आज सुनुवाइ हुने भएको छ।
मंगलबार न्यायाधीश अब्दुल अजीज मुसलमानको इजलासमा उक्त रिटको सुनुवाइ हुने भएको हो।
अधिवक्ता उपेन्द्र रावत समेतले प्रधानमन्त्री तथा मन्त्रिपरिषदको कार्यालय, महान्यायाधिवक्ता बराल, महान्यायाधिवक्ता कार्यालय, केन्द्रीय अनुसन्धान ब्युरो लगायतलाई विपक्षी बनाएर सोमबार रिट दायर गरेका थिए। त्यस रिटको प्रारम्भिक सुनुवाइ हुन लागेको हो।
नाबालिगको डिम्ब किनबेच गरेको उजुरी परेपछि केन्द्रीय अनुसन्धान ब्युरोले अनुसन्धान अघि बढाएको थियो।
बालबालिका सम्बन्धी ऐन, २०७४ अन्तर्गत अनुसन्धान गरेको विषयमा प्रहरीले डा. स्वस्ती शर्मा लगायतलाई नियन्त्रणमा समेत लिएको थियो। तर अदालतले पछि उनीहरूलाई हिरासतबाहिरै राखेर अनुसन्धान गर्न अनुमति दिएको थियो।
अनुसन्धान सकेर प्रहरीले भदौ १ गते अनुसन्धान प्रतिवेदन बुझाएर सरकारी वकिलको कार्यालय काठमाडौंमा पेस गरेको थियो। त्यहाँबाट मुद्दा नचलाउने निर्णय गरी सरकारी वकिलको कार्यालय पाटनमा पठाएको र पछि महान्यायाधिवक्ता कार्यलयबाट समेत मुद्दा नचलाउने निर्णय गरेको हो।
यसरी कार्यालयबाट पनि निर्णय भएपछि महान्यायाधिवक्ता बरालले आफ्ना आफन्तलाई जोगाएको आरोप लागेको हो।
-ink-1763370015.jpeg)
-1746009348.jpg)
