सर्वोच्च अदालतले निकोलस भुसाल भनिने कमल भुसाललाई हाजिर जमानीमा राखेर अनुसन्धान गर्ने गरी निर्णय लिन परमादेश जारी गरेको छ।
सोमबार न्यायाधीश नहकुल सुवेदी र नृपध्वज निरौलाको इजलासले भुसाललाई हाजिर जमानीमा राखेर अनुसन्धान गर्न परमादेश दिएको सर्वोच्चका सहरजिस्ट्रार तथा प्रवक्ता अर्जुनप्रसाद कोइरालाले जानकारी दिए।
भुसालले कात्तिक २० गते सर्वोच्च अदालतमा बन्दीप्रत्यक्षीकरणको रिट दायर गरेका थिए। उक्त रिटमा पहिलो सुनुवाइ गर्दा कारण देखाऊ आदेश र अदालतमा उपस्थित गर्न आदेश दिएको थियो।
‘इजलासले बन्दी प्रत्यक्षीकरणको रिट खारेज गरेको छ। तर यसमा परमादेश पनि जारी गरेको छ। भुसाललाई हाजिर जमानीमा छाडेर अनुसन्धान गर्नू भन्ने हिसाबले परमादेश जारी भएको छ,’ सर्वोच्चका प्रवक्ता कोइरालाले भने।
सर्वोच्चको आदेशमा भनिएको छ, ‘अभिव्यक्तिकै आधारमा मात्र भुसाललाई थुनामा नै राखी मुद्दाको अनुसन्धान गर्नु संविधानले आत्मसात गरेको वैयक्तिक स्वतन्त्रताको संरक्षण सम्बन्धी मूल्यमान्यता अनुकूल नदेखिएकाले मुलुकी फौजदारी कार्यविधि संहिता, २०७४ को दफा १५ समेतको कानूनी व्यवस्थाको रोहमा उनको अनुसन्धान तहकीकातको विश्वसनीयता र प्रभावकारीतामा असर नपर्ने गरी धरौटी वा जमानत लिई वा उनलाई हाजिरी जमानीमा राखी अनुसन्धान तहकीकात गर्ने गराउने सम्बन्धमा उपयुक्त निर्णय गर्नू भनी विपक्षीहरूका नाममा परमादेश जारी गरिएको छ।’
यस विषयमा सरकारी वकिलको कार्यालय काठमाडौं र जिल्ला प्रहरी परिसर काठमाडौंले निर्णय गरिसकेको छैन।
जिल्ला प्रहरी परिसर काठमाडौंका एसपी पवनकुमार भट्टराईले भुसालको बन्दीप्रत्यक्षीकरणको रिट खारेज भएको जानकारी दिए। यस्तै परमादेश आएको विषयमा पनि अध्ययन भइरहेको बताए।
‘रिट खारेज भएको छ। अरू परमादेशमा यस दफा अनुसार राखेर अनुसन्धान गर्न सकिनेछ भन्ने लेखिएको छ क्यार हेर्दैछन्,’ उनले भने।
सरकारी वकिल कार्यालय काठमाडौंका प्रमुख रामहरि शर्मा काफ्लेले पनि हाजिर जमानीमा निर्णय गर्न सकिने बताएको हुँदा छलफल गरिरहेको बताए।
‘हाजिर जमानीमा छाड्न सक्ने भनेर इंगित गरेको छ। आदेश ढिला आएको छ। त्यसबारेमा हामी छलफलमा छौं,’ उनले भने।
सुरक्षा निकायमाथि ड्रोन खसाल्ने अभिव्यक्ति दिएपछि प्रहरीले भुसाललाई कात्तिक १८ गते गोरखाको एक आश्रमबाट पक्राउ गरेको थियो।
उनलाई जिल्ला प्रशासन कार्यालय काठमाडौंबाट पाँच दिन हिरासतमा राखेर अनुसन्धान गर्न अनुमति दिएको थियो। उनीमाथि सार्वजनिक शान्ति विरूद्धको कसुरमा अनुसन्धान भएको थियो।
-1746009348.jpg)
