दोलखाको यलुङ रि क्षेत्रको हिमपहिरोमा परेर मृत्यु हुनेको संख्या ७ पुगेको छ।
गौरीशंकर गाउँपालिका-९ स्थित डोल्मा खाङ हिमाल आरोहण गर्न गएकामध्ये ७ जनाको मृत्यु भएको जिल्ला प्रहरी कार्यालयका डिएसपी ज्ञानकुमार महतोले जानकारी दिए।
उनका अनुसार पहिरोमा परी घाइते भएका ८ जनालाई भने उपचारको लागि काठमाडौं लगिएको छ।
‘उद्धारमा खटिएकाहरूले दिएको जानकारी अनुसार अहिलेसम्म पाँच जना विदेशी नागरिक र दुई जना नेपाली नागरिकको मृत्यु भएको छ,’ उनले भने, ‘८ जना घाइतेलाई उपचारका लागि काठमाडौंमा पठाइसक्यौं।’
विदेशी नागरिक कुन कुन देशका हुन् भन्ने यकिन विवरण आइसकेको छैन। मृतकको संख्या ७ पुगे पनि घटनास्थलबाट निकाल्न सकिसकेको छैन।
सोमबार साँझ उद्धारका लागि ३ वटै सुरक्षा निकायको संयुक्त टोली घटनास्थल तर्फ खटिएको छ।
सशस्त्र प्रहरी बल नेपाल बोर्डर आउट पोस्ट (बिओपी) लामाबगर, नेपाली सेना र नेपाल प्रहरीको गरी ५० जनाको संयुक्त सुरक्षा फौज घटनास्थलतर्फ परिचालन भएको हो।
सोमबार बिहान साढे १० बजे गौरीशंकर गाउँपालिका-९ मा रहेको यलुङरि गो हिमाल (५६३० मि) आरोहणको लागि कात्तिक ११ गते विदेशी र नेपाली नागरिक सहितको टोली गएका थिए।
-1746009348.jpg)
