१४ असोज २०८२ महाअष्टमीको दिन।
वीरगञ्जमा मेलाको चहलपहल थियो। राति साढे ११ बजेतिर वीरगञ्ज महानगरपालिका–१० गीता मन्दिर नजिकै सडकमा झगडा पर्यो।
अपरिचित व्यक्तिहरुको कुटपिटबाट ‘गोल्डेन’ भनिने २० वर्षीय शिवम साह घाइते भए।
उनलाई उपचारको लागि राति ११:४० बजे नारायणी अस्पताल पुर्याइएको थियो। चिकित्सकले ११:५० बजे उनलाई मृत घोषणा गर्यो।
उनको मृत्यु भइसकेपछि मात्रै प्रहरीले घटनाबारे जानकारी पाएको थियो।
अपराध अनुसन्धान अधिकृत सहितको टोलीले घटनास्थल तथा लासजाँच मुचुल्का तयार गर्यो।
नारायणी अस्पतालमा शव पोस्टमर्टमपछि परिवारले दाहसंस्कार गरे। बारा परवानीपुर गाउँपालिका वडा नं.९ घर भए पनि गोल्डेन पर्सा जिल्ला वीरगञ्ज महानगरपालिका वडा नं.१० मा बस्दै आएका थिए। उनी वीरगञ्जमा रिक्सा चलाउँथे।
चाडपर्वमा भएको घटनाको अनुसन्धानमा प्रहरी गम्भीरतापूर्वक लागेको थियो।
जिल्लामा नयाँ आएका जिल्ला प्रहरी कार्यालय पर्साका प्रमुख प्रहरी उपरीक्षक सुदीपराज पाठकको निर्देशनमा अनुसन्धान द्रुत गतिमा अघि बढ्छ। अपरेशन ‘च्यालेन्ज’ नाम दिएर अनुसन्धान अघि बढाइन्छ। दसैं जस्तो चाडको समयमा घटना भएकाले शान्ति सुरक्षा खस्केको सन्देश जाने चुनौती पनि प्रहरीलाई थियो। त्यसकारण तत्काल गम्भिरतापूर्वक अनुसन्धान थालिएको प्रहरी उपरीक्षक पाठकले बताए।
प्रारम्भिक अनुसन्धानपछि प्रहरीले २४ घन्टाभित्र १० जना आरोपी पहिचान गर्यो।
उपलब्ध प्रमाणहरुको भौतिक र प्राविधिक विश्लेषण पछि प्रहरीले अनुसन्धानलाई साँघुरो बनाउँछ। दुई दिन भित्र ५ जना आरोपीलाई पक्राउ गरी अनुसन्धान अघि बढाउँछ।
१६ असोजमा पत्रकार सम्मेलन गरी प्रहरीले वीरगञ्ज महानगरपालिका वडा नं.२४ रामगढवा बस्ने १९ वर्षीय गौतम पटेल, २० वर्षीय सुभांकर चौरसिया, २२ वर्षीय अमिरी पटेल भन्ने करण प्रसाद पटेल, २४ वर्षीय चन्दन चौरसिया र १९ वर्षीय अमन पटवा समेत ५ जना आरोपीलाई सार्वजनिक गर्छ।
वीरगञ्ज तथा नेपाल भारत सिमाना नजिक भिष्वा गाउँबाट उनीहरुलाई पक्राउ गरिएको प्रहरीको भनाइ छ।
तर तीमध्ये तीन जना घटना भएकै दिन राति वीरगञ्जबाट पक्राउ गरिएको थियो। भने दुई जना भागेर भारतको बिहार राज्य पश्चिमी चम्पारण जिल्लाको बल्थर गाउँमा लुकेर बसेका थिए। उनीहरूलाई भारतीय सुरक्षा निकायसँगको समन्वयमा नेपाल ल्याइएको थियो।
घटनामा संलग्न रहेको अरोपमा प्रहरीले २१ असोजमा नामथर वतन परिवर्तित ३४ जिल्ला २०८२/०८३ ( रामगढवा–१) बस्ने कानूनको विवादमा परेको एक बालकलाई पक्राउ गर्छ।
घटनापछि फरार रहेका उनी मुख्य आरोपी रहेको प्रहरीको निष्कर्ष थियो। उनले सामाजिक सञ्जालबाटै गोल्डेनलाई ‘घरमै बस्नु नत्र मारिदिन्छु ’ भनेर धम्क्याएका थिए।
मन्टु पटेल नामका अर्का युवक पनि पक्राउ पर्छन्। उनीहरु विरुद्ध पर्सा जिल्ला अदालतमा ज्यान सम्बन्धी कसूर ( कर्तव्य ज्यान ) मुद्धा दर्ता गरी अनुसन्धान प्रक्रिया अघि बढाउँछ। उनीहरुले ‘खुनी दरिन्दे’ नामक ह्वाट्स एप ग्रुप बनाएर कुराकानी गर्दै आएको तथ्य प्रहरी अनुसन्धानबाट खुलेको छ।
पर्सा जिल्ला अदालतले १४ कात्तिकमा गौतम, सुभांकर, अमिरीलाई पूर्पक्षका लागि कारागार चलान गर्ने, ३४ जिल्ला २०८२/०८३ (रामगढवा–१) लाई बाल सुधार गृहमा पठाउने आदेश दिन्छ। अदालतको आदेश अनुसार तीन जनालाई कारागार र एक जनालाई बाल सुधार गृह पठाइएको जिल्ला प्रहरी कार्यालय पर्साका प्रवक्ता एवं सूचना अधिकारी प्रहरी नायब उपरीक्षक हरि बहादुर बस्नेतले जानकारी दिए।
अमन र चन्दनसँग अदालतले २/२ लाख धरौटी माग गरेको थियो। उनीहरु धरौटी बुझाएर छुटेका छन्। अदालतले मागेको ५० हजार धरौटी बुझाउन नसकेपछि मन्टुलाई पनि कारागार पठाइएको प्रहरीले जनाएको छ।
‘खुनी दरिन्दे’ समूहले गोल्डेनको हत्या गरेको पुष्टी
अनुसन्धानमा संलग्न प्रहरी अधिकृतका अनुसार १४ असोजमा गोल्डेन ‘गहवामाईको मेला हेर्न जान्छु’ भनि घरबाट निस्किएका थिए।
मेलामा केटाहरूसंग वाद–विवाद तथा हात हालाहाल भएको थियो। विगतका दिनमा पनि यी दुई समूहबीच एक आपसमा वादविवाद तथा झै–झगडा हुने गरेको थियो। रिसइबी साँध्न एक्लो भएको मौका छोपी ‘खुनी दरिन्दे’ समूहका केटाहरूले हात मुक्का, बाँसका भाँटा र चक्कु समेत प्रहार गरी मारेको अनुसन्धानबाट खुलेको प्रहरी उपरीक्षक पाठक बताउँछन्।
‘उनीहरुबीच पहिला पनि झै झगडा हुने गरेको रहेछ, एक वर्ष अघि पनि प्रहरी कार्यालयसम्म आएको देखिएको छ,’ उनले भने, ‘किशोरअवस्थामा उत्पन्न भएको बदलाको भावना, पुरानो रिसिइबी, आफूलाई कु–ख्यात सावित गर्न तथा आफ्नो समूहको बर्चश्व कायम गर्ने उद्देश्यले हत्या भएको देखिन्छ।’
घटनाको सुक्ष्म अनुसन्धान, प्राप्त सूचना तथा प्रमाणहरूको विधि तथा प्रविधिको प्रयोग गरी विश्लेषणबाट अनुसन्धानको दायरा साँघुरो बनाई घटनाका मुख्य योजनाकार, प्रत्यक्ष संलग्न, सहयोगी र मतियारहरु पहिचान गरिएको उनले बताए।
त्यसका लागि घटनास्थलमा रहेको सिसिटीभी फुटेज तथा भिडियो रेकर्ड, कल डेटा रेकर्ड (सिडिआर) तथा संकलित अन्य प्रमाणहरू विश्लेषण गरिएको थियो। अनुसन्धानका क्रममा प्रहरीले उनीहरुले प्रयोग गर्ने सामाजिक सञ्जाल ह्वाट्स एप ग्रुप र फेसबुक पोष्टहरुको समेत विश्लेषण गरेको थियो। घटनाको दिन उनीहरुले नसालु पदार्थ समेत सेवन गरेको पाइएको अनुसन्धानमा संलग्न प्रहरी अधिकारीहरु बताउँछन्।
अनुसन्धानमा संलग्न एक अधिकृतका अनुसार घटनास्थलको सिसिटिभी फुटेज नै अनुसन्धानको बलियो आधार बन्यो। सिसिटिभी फुटेज विश्लेषणको आधारमा नै प्रहरीले संकास्पद अभियुक्तहरुलाई पक्राउ गरेर ल्याएको थियो।
‘अनुसन्धान तथा विश्लेषणबाट जेजे कुरा पहिचान गरिन्थ्यो, त्यसलाई सिसिटिभी फुटेजले पुष्टी गर्दथ्यो। सिसिटिभी फुटेज अनुसन्धानको बलियो औजार बन्यो,’ उनले भने, ‘सिसिटिभी फुटेज थिएन भने अनुसन्धानमा यति छिटो सफलता मिल्ने थिएन।’
-1746009348.jpg)
