रूकुम पश्चिमको आठबिसकोट नगरपालिका–२ की २० वर्षीया महिमा वली शुक्रबार बेलुका रा १ ज ४२२ नम्बरको जिपको अगाडिको सिटमा बसेर यात्रा गर्दै थिइन्।
जिप स्यालाखाँदीबाट खलंगातर्फ जाँदै थियो। जिपमा २० जना बढी सवार थिए। उनीहरू त्रिवेणी गाउँपालिकास्थित मण्डलीबाट घरतर्फ फर्किँदै थिए।
खलंगास्थित महेन्द्र बहुमुखी क्याम्पसमा बिबिएस द्वितीय वर्षमा अध्ययनरत महिमा सवार गाडीको हुटमा पनि मानिसहरू चढेका थिए।
बाटो ठाडै उकालो थियो अनि गाडी पनि ओभर लोडेड। साँझ साढे ५ बज्दै थियो। बाफिकोट गाउँपालिका–७ लिस्नेको उकालो चढ्न गुडिरहेको गाडीको खट्याक्क आवाज आयो। जिप मुसिकोट नगरपालिका –२ का ३४ वर्षीय टोपजंग बुढाले हाँकिरहेका थिए। चालक एकाएक कराए।
'लौ खत्तम भयो। मेन पट्टा नै भाँचिए जस्तो छ,' भन्दै चालक कराए।
त्यसपछि गाडी उकालोमा अगाडि बढ्न सकेन। बरू उल्टो गति समात्यो।
मानिसहरू कराउन थाले। बचाउन भन्दै बिलाप गर्न थाले। छतमा बसेका केटा जतिले तत्कालै हाम फाले। तीव्र गतिमा रिभर्स (ब्याक) गुडिरहेको गाडी भित्रका यात्रुले ओर्लिने वा भाग्ने मौका नै पाएनन्। गाडीको अगाडि सिटमा सवार महिमा पनि गाडीसँगै भीरदेखि खसिन्। त्यतिखेर उनले सोचेकी थिइन्– बाँच्नु भन्ने यत्ति लेखेको रहेछ। तर, उनको तक्दिर बलियो थियो। फिल्मी शैलीमा गाडीसँगै खसे पनि उनी फुत्त झ्यालबाट भुइँमा झरिन्।
महिमाका अनुसार गाडीको अगाडिको सिसा खुल्लै राखिएको थियो। त्यही झ्यालबाट गाडी बलड्याङ खाँदै गर्दा उनी भुइँमा झरेकी थिइन्।
‘म अगाडि बसेकी थिएँ र म बस्ने ठाउँ नजिकको झ्यालको सिसा लगाइएको थिएन,’ महिमाले भनिन्, ‘मेरो तक्दिर बलियो रहेछ र म पहिलो पटक गाडी बलड्याङ खाँदै गर्दा त्यहीँबाट खसे र भाग्यले जोगिएँ।’
‘मैले उठेर नियाल्दा गाडी कतै देखिनँ। केबल पाखा पहरामा बजारिएको आवाज मात्रै गुञ्जिरहेको थियो,’ महिमाले भनिन्, ‘म गाडीको सिसाबाट भुइँमा झरेपछि उठेर बाटोतर्फ उक्लिँदै गर्दा हुटबाट हाम फालेका केटाहरू अनौठो मान्दै मलाई नियालिरहेका थिए।’
हुटबाट हाम फालेका ती केटाहरूले नै स्थानीय र प्रहरीलाई दुर्घटनाबारे खबर गरेको महिमाले बताइन्।
‘त्यतिधेरै मानिस बोकेको जिप कतै नदेखिएपछि म निकै आत्तिए छु र त्यसपछि के भयो मलाई केही थाहा छैन,’ महिमाले भनिन्, ‘मलाई त्यो दुर्घटना सम्झिँदा अझैसम्म निकै डर लागिरहेको छ। सायद मैले यो दुःखद् घटना कहिल्यै भुल्न नसकुली।’
उनलाई सामान्य चोट पटक मात्रै लागेको छ।
महिमाका अनुसार उनको निधार र खुट्टामा सामान्य चोटपटक छ। जिल्ला अस्पताल सल्लेमा उपचाररत उनले आफ्नो अवस्था सामान्य रहेको र घर जान सक्ने कुरा चिकित्सकले आफूलाई भनेको बताइन्।
मृतकको संख्या आठ पुग्यो
शुक्रबार बेलुकी भएको उक्त जिप दुर्घटनामा परी मृत्यु हुनेको संख्या आठ पुगेको छ।
बाफीकोट गाउँपालिका–१ की २८ वर्षीया सबिता विकको जिल्ला अस्पताल सल्लेमा उपचारका क्रममा राति दश बजेपछि मृत्यु भएसँगै मृतकको संख्या दश पुगेको हो। त्यसअघि घटनास्थलमै आठबिसकोट नगरपालिका–३ स्यालाकी ३० वर्षीया कमला वली, आठबिसकोट–१ का १६ वर्षीय टेकजंग बुढा, सोही वडाकी १५ वर्षीया दिलमाया बुढा, आठबिसकोट– २ की १७ वर्षीया मनिका वली, सोही वडाकी १८ वर्षीया शर्मिला विक, सोही वडाका २२ वर्षीय गोपाल वली र आठबिसकोट–१ की १५ वर्षीया कल्पना नेपालको मृत्यु भएको थियो।
दुर्घटनाका दश घाइतेमध्ये आठबिसकोट–१ की १८ वर्षीया जुना बुढालाई थप उपचारका लागि बाँकेको नेपालगञ्ज रिफर गरिएको छ। अन्य घाइतेहरूमा चालक मुसिकोट नगरपालिका–२ का ३४ वर्षीय टोपजंग बुढा, आठबिसकोट–१ की १७ वर्षीया सिर्जना बुढा, सोही वडाकी १५ वर्षीया सपना नेपाल, आठबिसकोट–२ की १७ वर्षीया संगीता बुढा, सोही वडाकी १९ वर्षीया शान्ति बुढा, सोही ठाउँकी १७ वर्षीया अञ्जना ऐरीको अवस्था मध्यम रहेको छ।
जिल्ला प्रहरी प्रमुख प्रमिश विष्टका अनुसार उनीहरू सबैको जिल्ला अस्पताल सल्लेमा उपचार जारी छ।
दुर्घटनाकी घाइतेमध्ये आठबिसकोट– २ की १७ बर्षीया मनिषा थापा र सोही वडाकी १५ वर्षीया सविता विकको अवस्था पनि सामान्य रहेको जिल्ला प्रहरी प्रवक्ता प्रहरी निरीक्षक हरि पुनले बताएका छन्।
गाडी सडकबाट झन्डै सात सय मिटर तल खसेको प्रहरीले जानकारी दिएको छ।
प्रहरी भने दुर्घटनाको कारण खुलिनसकेको बताउँछ।
-copy-1761394385.jpg)
-1746009348.jpg)
