वीरगन्जस्थित एक सुनचाँदी व्यवसायीको घरमा राजस्व अनुसन्धान कार्यालय, पथलैयाले छापा मारेको छ।
सोमबार माईस्थानस्थित अभिषेक ज्वेलर्सका सञ्चालक अभिषेक सर्राफको घरमा राजस्वले छापा मारेको हो।
सशस्त्र प्रहरीको सुरक्षा घेरा बनाएर राजस्वले बिहानदेखि दिउँसोसम्म छापा मारेको थियो।
सो क्रममा घरभित्र राखिएका सुनचाँदीका गहना र कारोबारसँग सम्बन्धित कागजातहरू बरामद भएको स्रोतले जनाएको छ। स्रोतका अनुसार अभिषेक गरगहना धितो राखेर ऋण दिने कार्यमा संलग्न रहेको पाइएको छ।
राजस्व चुहावट नियन्त्रणका लागि राजस्व अनुसन्धान कार्यालयले खानतलासी गर्न र आवश्यक प्रमाण संकलन गर्ने अधिकार राख्छ।
स्रोतका अनुसार टोलीले बरामद गरेको सुनचाँदी लगायत सामग्री सुनचाँदी व्यवसायी संघ, पर्साको कार्यालयमा तौलेर आवश्यक कानुनी प्रक्रिया अगाडि बढाइएको छ। अब अभिषेक विरूद्ध राजस्व चुहावट (अनुसन्धान तथा नियन्त्रण) ऐन, २०५२ बमोजिम कारबाही प्रक्रिया अघि बढाउने पनि स्रोतले बतायो।
वीरगन्ज महानगरपालिका वडा नम्बर ९ का अध्यक्ष जवाहर प्रसाद गुप्ताले अभिषेकको घरमा राजस्व टोलीले छापा मारेको तर के कति सामान बरामद गर्यो भन्नेबारे जानकारी नगराएको बताए।
'बरामदी मुचुल्का गर्ने भनेर बोलाएका थिए। तर म पुग्दा सामान लिएर गइसकेका रहेछन्,' उनले भने।
राजस्व अनुसन्धान कार्यालयले भने 'अपरेसन' अझै नटुंगिएकाले धेरै जानकारी दिन नसक्ने बताएको छ।
कार्यालयका सूचना अधिकारी पुष्पराज कोइरालाले भने, 'अपरेसन टुंगिएको छैन, त्यसैले अहिले बोल्ने अवस्था छैन। हामी यही काममै व्यस्त छौं।'
राजस्वको छापापछि वीरगन्जका अन्य सुनचाँदी व्यवसायी आत्तिएका छन्। उनीहरूको विरोधले दिनभर तनाव सिर्जना भएको थियो।
उनीहरूले राजस्वले गरेको छापाको विरोधमा नाराबाजी गरेका थिए। छापा मारेर फर्किने बेलामा राजस्व अनुसन्धान कार्यालय र सुरक्षाकर्मीको गाडी माईस्थान चोकमै रोकेका पनि थिए।
छापाको नाममा अनावश्यक दुःख दिएको र ठूलो संख्यामा सुरक्षाकर्मी परिचालन गरेर त्रसित बनाएको आरोप उनीहरूको थियो।
'दुई/चार जना आएर अनुसन्धान गरेर जान सकिन्छ नि! पूरै सुरक्षा फौज उतारेर ब्यारिकेड लगाउन के जरूरी थियो?' एक व्यवसायीले भने।
-1746009348.jpg)
