सिराहा गोलबजार नगरपालिका–१३ का १६ वर्षीय अभिषेक सिंहको अपहरणपछि उनकी आमाको मोबाइलमा धम्कीपूर्ण मेसेज आएको प्रहरी अनुसन्धानमा पाइएको छ।
उनकी आमा रेखा सिंहको नम्बरमा सोमबार बिहान अभिषेककै नम्बरबाट हिन्दी भाषामा आएको मेसेज सेतोपाटीलाई प्राप्त भएको छ।
हिन्दी भाषामा लेखिएको मेसेजमा भनिएको छ- 'तुमहारा आदमी हमारे पास है। अगर तुमहरा आदमी सही सलामत चाहिए तो ५ करोड रुपैयाँ हामे दो, तब हम तुम्हरा आदमी तुम्हे देङ्गे। अगर नही दिया तो मार के फेक दुङ्गा। पुलिसको बताने कि कोसिस कि तो मार के फेक दुङ्गा। हमे २५ तारिख तक पैसा चाहिए नही तो मार दुङ्गा। तुम्हारे गाउँ मे किसिको पता नही चल्ना चाहिए। जानकारी के लिए हम बिहार से है। टेन्सन नही लेना तुम्हरा आदमी सही सलामत है। बस हमारी माग पुरी कर्दो, हम तुम्हरा आदमी वापस करूंगा।’ (तिम्रो मान्छे हामीसँग छ। यदि तिमीले तिम्रो मान्छेलाई सुरक्षित नै चाहन्छौ भने हामीलाई ५ करोड रुपैयाँ देऊ, त्यसपछि हामी तिम्रो मान्छेलाई फर्काइदिनेछौँ। नदिएमा मारेर फाल्नेछौँ। प्रहरीलाई भन्नु या कोशिश गर्यो भने पनि मारेर फ्याँक्नेछौँ। हामीलाई २५ तारिखसम्म पैसा चाहिन्छ, नत्र मार्नेछौँ। तिम्रो गाउँमा कसैले यो बारेमा थाहा पाउन हुँदैन। जानकारीको लागि हामी बिहारबाट हौँ। चिन्ता नगर, तिम्रो मान्छे सुरक्षित छ। मात्र हाम्रो माग पूरा गर, हामी तिम्रो मान्छेलाई फर्काइदिनेछौँ।)
उक्त मेसेज उनकी आमालाई छोराकै नम्बरबाट आएको स्रोतले सेतोपाटीलाई जानकारी दियो। प्रहरीले पनि फिरौती माग गर्दै मेसेज छोराकै नम्बरबाट आएको पुष्टि गरेका छन्।
जिल्ला प्रहरी कार्यालय सिराहाका इन्स्पेक्टर धर्मेन्द्रकुमार यादवले ५ करोड फिरौती मागेर छोराकै नम्बरबाट इमोमा मेसेज आएको छ। उक्त फोन कहाँ कोसँग छ भन्नेबारे अनुसन्धान भइरहेको छ।
'अनुसन्धानकै विषय भएकाले तत्काल केही भन्न सकिँदैन,' उनले भने, '८ जनालाई नियन्त्रणमा लिएर अनुसन्धान गरिरहेका छौं।'
सेतोपाटी स्रोतका अनुसार अभिषेकको शव भेटिए नजिकै खाल्डो खनेको पाइएको छ। त्यसैले घटनामा संलग्न भएको भन्दै ५ जना आफन्त र ३ जना छिमेकीलाई नियन्त्रणमा लिइएको छ।
अभिषेक आइतबार राति साढे ८ बजेतिर खाना खाएर बाहिर निस्केका थिए। सोमबार बिहानसम्म कतै भेटिएका थिएनन्। छोरो हराएको भन्दै दोस्रो दिन अभिषेककी आमाले वडाध्यक्ष नन्दकुमार महतोलाई फोन गरेर घर बोलाएकी थिइन्। त्यही बेला उनले प्रयोग गर्ने सामाजिक सञ्जाल 'इमो' मा अपहरणकर्ताको धम्कीपूर्ण मेसेज आएको उनको काका रामकुमार महतोले जानकारी दिए।
'मेसेजमा ५ करोड रूपैयाँ मागिएको थियो। नदिए तपाईंको छोरा मारिदन्छौं भनेर भनिएको थियो,' रामकुमारले भने, 'हामीले इमोमा मेसेज आउन बित्तिकै फोन गर्दा नम्बर तुरून्तै स्वीच अफ थियो।'
त्यति ठूलो रकम माग गरिएपछि रेखा सिंह आफन्तहरूसँग सहयोग माग्ने तयारीमा थिइन्। सामान्य कृषि गरेर गुजारा चलाइरहेकी रेखाका लागि ५ करोड धेरै ठूलो रकम भएको रामकुमार बताउँछन्।
'अभिषेकको बुबा करेन्ट लागेर केही वर्षअगाडि नै बितिसक्नुभयो। त्यसैले त्यो रकम जुटाउन सक्ने अवस्था थिएन,' उनले भने, 'भतिजले नै ट्याक्टर चलाएर आमाछोराको गुजारा चलाइरहेका थिए।'
अभिषेकले ४/५ कक्षाभन्दा माथि पढेका छैनन्। बुबा बितेपछि आमालाई सघाउन ट्याक्टर चलाउन थालेका थिए।
अहिले गाउँमा झिझिया नाच चलिरहेको छ। अभिषेक आइतबार राति त्यही नाच हेर्न गएका होलान् भन्ने आमाले सोचेकी थिइन्। राति ढिलासम्म नआएपछि खोजतलास सुरू गरिएको रामकुमारको भनाइ छ।
'सोमबार मेसेज आएपछि खोजतलासको काम भइरहेको थियो। मंगलबार बिहान गाउँका मानिस खेतमा काम गर्न निस्किँदा अभिषेकको शव बस्ती नजिकै भेटिएको प्रहरीलाई खबर गरेका थिए।
यो पनि :
अपहरणपछि हत्या गरिएका अभिषेककी आमाको 'इमो' मा आएको थियो फिरौतीको मेसेज
अपहरणपछि हत्या भएको घटनामा तालिम प्राप्त कुकुर परिचालन
अपहरणपछि मागिएको थियो ५ करोड फिरौती, बालक मृत भेटिएपछि आफन्तहरूसँग सोधपुछ
-1758614109.jpg)
-1746009348.jpg)
