तुइन खोलामा फेरि ठूलो पहिरो खसेको छ।
सडक डिभिजन कार्यालय भरतपुरले पहिरोका कारण नारायणघाट-मुग्लिन सडक पूर्ण रूपमा अवरूद्ध भएको बताएको छ।
सानो पहिरो निरन्तर रूपमा खसिरहेकोमा अपराह्न ५ बजेतिर ठूलो पहिरो झरेको हो।
पहिरो खसिरहेका कारण उपकरण सञ्चालन गरी बाटो खुलाउन समस्या भएको छ।
यहाँ गत शुक्रबार राति ७ बजेदेखि आइतबार ४ बजेसम्म सडक पूर्ण रूपमा अवरूद्ध भएको थियो। त्यसपछि पहिरो पन्छाउँदै यातायात सञ्चालन गरिएको थियो।
सडक डिभिजन कार्यालय चितवनका सूचना अधिकारी इन्जिनियर कृष्णप्रसाद आचार्यले मंगलबारको पहिरो शुक्रबारको भन्दा ठूलो रहेको बताए।
यो पन्छाउन भोलि दिनभर लाग्नसक्ने जानकारी उनले दिए।
‘आजैबाट काम सुरू गर्छौं। अँध्यारो भएपछि काम गर्न सकिँदैन। बिहानै फेरि सुरू गर्छौं,’ उनले भने, ‘पहिरो पन्छाउन कमसेकम भोलि दिनभर लाग्न सक्छ।’
-1746009348.jpg)
