तुइन पुलनजिकै निरन्तर पहिरो झरेपछि ३६ घन्टादेखि नारायणगढ मुग्लिन–सडक अवरूद्ध छ।
ढुंगा झर्ने क्रम अझसम्म पनि नरोकिएको भरतपुर सडक डिभिजन कार्यालयले जानकारी दिएको छ।
आइतबार बिहानैदेखि मुग्लिन साइडतर्फ र नारायणगढ तर्फबाट उपकरण परिचालन गरी पहिरो पन्छाउने काम सुरू भएको छ। तर थप पहिरो झर्ने जोखिम उत्तिकै छ।
‘थप पहिरो नझरे, निरन्तर रूपमा कार्य गर्दा बाधा भएन भने छिटोभन्दा छिटो सवारी आवागमन सञ्चालनमा ल्याउन कटिबद्ध रहेका छौं,’ भरतपुर सडक डिभिजनले जानकारी दिएको छ।
शुक्रबार साँझदेखि भिरबाट सडकमा ढुंगा खसेर बाटो अवरूद्ध भएपछि पहिरो पन्छाउन सकस भएको थियो।
शनिबार बिहानबाट पहिरो थामिँदा पन्छाउने, झर्दा रोक्ने गर्दै काम गरेको कार्यालयका सूचनाका अधिकारी इन्जिनियर कृष्ण आचार्यले बताए। तर रातिसम्म पनि पन्छाउन नसकेपछि बिहानबाट पुनः सुरू गर्ने गरी काम स्थगित गरिएको थियो।
सडक बन्द हुँदा हजारौंको संख्यामा सवारी साधनहरू रोकिएका छन्। यात्रुहरू बाटैमा अलपत्र बनेका छन्।
नारायणघाट–मुग्लिन सडक चितवन तथा पूर्व–पश्चिम नेपाल सवारी साधनहरु देशको राजधानी काठमाडौं प्रवेश गर्ने महत्वपूर्ण राजमार्ग हो। यसको विकल्पमा पश्चिमका यात्रुहरु पोखरा हुँदै, पूर्वका यात्रुहरू हेटौंडा तथा सिन्धुली हुँदै काठमाडौं जान मिल्छ।
चितवनको शक्तिखोरबाट पृथ्वी राजमार्गको फिस्लिङ निस्कन मिल्ने सडक पनि छ। यो सडकमा साना सवारी साधनहरूमात्रै चल्न सक्छन्।
दुई वर्षअघि तुइन खोलामा नयाँ पुल निर्माण गर्नेक्रममा पहरो फोरिएको थियो। पहरो फोरिएकै आडबाट पहिरो झर्न थालेको हो। यहाँ गत वर्ष पनि पहिरो झरेको थियो।
-1746009348.jpg)
