पोखरामा नाबालिका बलात्कार प्रयासको घटना वडा कार्यालयमा जनप्रतिनिधिकै रोहबरमा मिलापत्र गरेको पाइएको छ।
पोखरा महानगरपालिका वडा नम्बर– २९ का वडाध्यक्ष श्रीप्रसाद गुरुङसहित जनप्रतिनिधि र टोल विकास समितिको रोहबरमा मिलापत्र गरेको एक जनप्रतिनिधिले बताए।
ती प्रतिनिधिका अनुसार स्थानीय ३० वर्षीय युवकले गत बुधबार राति एक नाबालिकाको कोठामा छिरेर उनीमाथि बलात्कार प्रयास गरेका थिए। नाबालिका चिच्याएपछि युवक भागेका थिए।
घटना भएपछि पीडित परिवार टोल विकास संस्थामा गएका थिए भने उनीहरुले वडाध्यक्ष गुरुङको घरमा समेत पुगेका थिए।
वडाध्यक्ष गुरुङसहित जनप्रतिनिधि र टोल विकास समितिका पदाधिकारी मिलेर घटनाको मिलापत्र गरेका हुन्। वडाध्यक्ष गुरुङ नेकपा एमालेबाट निर्वाचित हुन्।
मिलापत्र गर्दा बलात्कार प्रयास गरेका युवकलाई नाबालिकाको खुट्टामा ढोग्न लगाइएको र २५ पटक उठबस गराइएको थियो।
'अब आइन्दा त्यस्तो नगर्ने शर्तमा मिलापत्र गराइएको रहेछ,' सोही वडाका एक जनप्रतिनिधिले भने।
उक्त घटना फौजदारी अभियोग हुने र वडामा मिलापत्र गर्न नमिल्ने बताए पनि वडाध्यक्ष र टोल विकास समितिले मिलापत्र गराएको ती जनप्रतिनिधिले बताए।
यसबारे बुझ्न हामीले वडाध्यक्ष गुरूङलाई पटक पटक फोन गरेपनि उनले उठाएनन्।
दलित समुदायका नाबालिकाको कोठामा जाँदा युवक मदिराले मातेको अवस्थामा रहेको पनि स्थानीयले बताएका छन्।
नाबालिका बलात्कार प्रयासको उक्त घटनाबारे जिल्ला प्रहरी कार्यालयमा कुनै जानकारी नआएको सुचना अधिकारी डिएसपी हरिबहादुर बस्नेतले बताए।
‘बलात्कारका घटनामा मिलापत्र गर्न मिल्दैन,’ उनले भने, ‘यसबारे हामीलाई अहिलेसम्म कुनै जानकारी आएको छैन।’
-1746009348.jpg)
