मंगलबार दिन ढल्किँदै जाँदा जेनजीको प्रदर्शन विराटनगरमा मत्थर हुँदै जाँदै थियो।
त्यहीबेला भाटभटेनी सुपरस्टोरमा भने लुटपाटमा एउटा समूह सक्रिय थियो।
प्रत्यक्षदर्शीहरुका अनुसार भाटभटेनीमा लहरै राखिएका विभिन्न बैंकका एटिएमहरु फोड्ने प्रयास चल्यो। तर, एटिएम मेसिन फोड्ने प्रयास विफल भएपछि उक्त समूहले एटिएममै आगो लगाइदिएको थियो।
यसरी मंगलबार साँझ एटिएमबाट झोसिएको आगोले पाँच तले भाटभटेनी स्टोर, त्यहाँभित्र रहेका सम्पूर्ण सामान डढेर खरानी बनेका छन्। आगो अहिले पनि दनदनी अवस्थामा छ।
भाटभटेनीको पाँचौं तलसम्मै आगो फैलिंदा भित्र रहेका सवै सरसामान जलेर खरानी भएका छन्।
जमिनमुनि पार्किङका लागि बनाइएको भुइँतलामा अहिले पनि आगो दनदनी बलिरहेको छ।
अन्डर ग्राउण्डमा आगो लागेका कारण भाटभटेनीको वरिपरीको जमिन फुलिएर माथि उठेको छ। भित्र आगो लाग्दा तातो धुँवा बाहिर जान नसक्दा जमिन फुलिएर फुटेको ठाउँबाट धुवाँ निस्किरहेको छ।
मंगलबार दिनभरी सरकारी कार्यालयहरूमा तोडफोड गर्दै हिंडेका प्रदर्शनकारीहरूले साँझ परेपछि भाटभटेनीलाई केन्द्रीत गरेर तोडफोड सुरु गरेका थिए।
विराटनगर महानगरपालिकाको दमकलले आगो नियन्त्रणको प्रयास गरेपनि सम्भव देखिएको छैन।
-1746009348.jpg)
