अछाममा त्रिपालले बारेर बनाइएको छाउगोठमा पहिरो खस्दा दुई जनाको मृत्यु भएको छ।
पञ्चदेवल विनायक नगरपालिका–८ सेलापानीस्थित चुरखुलीमा पहिरोसँगै खसेको ढुंगाले लागेर ३५ वर्षीया निमा खनाल र ७ वर्षीया कविता भण्डारीको मृत्यु भएको हो।
जिल्ला प्रहरी कार्यालय अछामका प्रमुख डिएसपी ओमप्रकाश खनालका अनुसार महिनावारी भएपछि गएराति निमा र रत्ना भण्डारी त्रिपालले बारिएको सोही छाउगोठमा सुत्न गएका थिए। उनीहरू छिमेकी हुन्।
कविता रत्नाकी छोरी हुन्। उनी पनि आमासँगै सुत्न छाउगोठ गएकी थिइन्। छाउगोठ घरबाट करिब ५० मिटरको दूरीमा रहेको डिएसपी खनालले जानकारी दिए।
शुक्रबार बिहान ५ बजे अविरल वर्षापछि आएको पहिरोसँगै खसेको ढुंगाले लागेपछि कविता र निमाको घटनास्थलमै मृत्यु भएको हो।
ढुंगाले लागेर रत्ना पनि गम्भीर घाइते छिन्। उनको टाउकोमा चोट छ। उनलाई उपचारका लागि अस्पताल पठाइएको छ।
घटनास्थलमा जिल्ला प्रहरी कार्यालयबाट प्रहरी निरीक्षक टेकबहादुर देउवाको नेतृत्वमा प्रहरी टोली पुगेको छ।
घटनाबारे थप अनुसन्धान भइ रहेको प्रहरीले जनाएको छ।
-1755241369.jpg)
-1746009348.jpg)
