पछिल्लो चौबीस घन्टामा देशका अधिकांश भूभागहरुका वर्षा भएको छ।
जल तथा मौसम पूर्वानुमान महाशाखाको विवरणले कोशीदेखि सुदूरपश्चिम प्रदेशसम्मका भूभागहरुका हल्कादेखि मध्यम र भारीदेखि धेरै भारी वर्षा भएको देखाउँछ।
चौबीस घन्टाको तथ्यांक हेर्दा देशभरिका १७ ठाउँमा एक सय मिलिमिटरभन्दा बढी पानी परेको छ।
कास्कीको रिवनमा सबैभन्दा बढी पानी परेको छ। त्यहाँ चौबीस घन्टामा १४८.८ मिलिमिटर वर्षा भएको छ।
त्यस्तै रूकुम पूर्वको बाफीकोटमा १४६.८ मिलमिटर, रूपन्देहीको लुम्बिनीमा १४१.८ मिलिमिटर, कास्कीको यमजाकोटमा १३१.१ मिलिमिटर, घलेखर्कमा १२९ मिलिमिटर, लुम्लेमा १०२.८ मिलिमिटर, पोखरामा १०५.२ मिलिमिटर वर्षा भएको छ।
त्यस्तै लमजुङको भूजुङमा ११०.८ मिलिमिटर, गोरखाको बारपाकमा १०३.४ मिलिमिटर, सिन्धुपाल्चोकको बोल्डेमा १०५.२ मिलिमिटर, पाल्पाको जाल्पामा ११५.६ मिलिमिटर, हात्तीलुङमा ११६.६ मिलिमिटर, रूपन्देहीको तिलोत्तमामा ११२.४ मिलिमिटर, नवलपरासी पश्चिमको देउराली नवलमा १०२ मिलिमिटर, नवलपरासीको परासीमा १००.२ मिलिमिटर, भैरहवामा १०३.२ मिलिमिटर वर्षा भएको छ।
त्यस्तै धेरै ठाउँहरूमा ५० मिलिमिटरभन्दा बढी एक सय मिलिमिटरभन्दा कम वर्षा मापन भएको छ। कोशीका एक/दुई स्थान, बागमतीका केही ठाउँ तथा गण्डकी र लुम्बिनीका अधिकांश ठाउँहरुमा ५० मिलिमिटरभन्दा बढी पानी परेको छ।
यसअघि सुख्खाग्रस्त घोषणा भएको मधेसमा भने हल्का वर्षा मात्रै भएको तथ्यांकले देखाउँछ।
मौसमको शब्दावलीमा १० मिलिमिटरसम्मको वर्षालाई हल्का, १०-५० मिलिमिटरसम्मको वर्षालाई मध्यम, ५०-१०० मिलिमिटरसम्मको वर्षालाई भारी, १०० देखि २०० मिलिमिटरसम्मको वर्षालाई धेरै भारी र २०० मिलिमिटरभन्दा बढी पानी पर्यो भने अति भारी वर्षा भनिन्छ।
हाल मनसुको प्रभाव कायमै रहेको र न्यूनचापीय रेखा पनि सरदर स्थान आसपास नै छ। काठमाडौं उपत्यका लगायतका ठाउँहरूमा अपराह्नसम्म मौसम सफा रहने त्यसपछि पानी पर्ने क्रम चलिरहेको छ।
शुक्रबार दिउँसो पनि कोशी प्रदेश, बागमती प्रदेश, गण्डकी प्रदेश र लुम्बिनी प्रदेश लगायत देशका पहाडी भू-भागका केही स्थानहरूमा र बाँकी तराई भू-भागको थोरै स्थानहरूमा मध्यम वर्षाको सम्भावना रहेको छ।
त्यस्तै कोशी प्रदेश, बागमती प्रदेश, गण्डकी प्रदेशका पहाडी भू-भाग र लुम्बिनी प्रदेशको तराई र पहाडी भू-भागका थोरै स्थानहरूमा भारी वर्षाको सम्भावना रहेको छ ।
शुक्रबार राति देशका पहाडी भू-भागका केही स्थानहरूमा र तराई भू-भागका थोरै स्थानहरूमा मध्यम वर्षाको सम्भावना रहेको छ।
त्यस्तै गण्डकी प्रदेश र सुदूरपश्चिम प्रदेशका पहाडी भू-भागका एक-दुई स्थानमा राति भारी वर्षाको सम्भावना रहेको छ ।
-1746009348.jpg)
