बाँकेको कर्णाली विकास बैंकको घोटाला प्रकरणमा १०९ जनाविरूद्ध मुद्दा दायर भएको छ।
बुधबार सरकारी वकिलको कार्यालय बाँकेले ३ अर्ब २० करोड ११ लाख ५४ हजार १५७ रुपैयाँ बिगो माग गरी उच्च अदालत, तुलसीपुर–नेपालगञ्ज इजलासमा मुद्दा दायर गरेको हो।
१०९ जनामध्ये चार जना पक्राउ परेका छन्। दुई जना मृतक र बाँकी फरार प्रतिवादी बनाएर मुद्दा दर्ता गरेको हो।
मृत्यु भइसकेकाहरूमा राप्ति पोलिमर्स प्रालिका संचालक महेशजंग थापा र बैंकका तत्कालीन धर्मचारी धनन्जय कश्यप छन्।
पक्राउ पर्नेमा संस्थापक अध्यक्ष राजेन्द्रवीर राय, तत्कालीन वित्त अधिकृत वेदप्रकाश सिंह ठकुरी, संचालक समिति अध्यक्ष पशुपति दयाल मिश्र र नेपाल राष्ट्र बैंकका अनुगमन अधिकृत भुवन बस्नेत छन्।
उनीहरू सबै जनाविरूद्ध सरकारी वकिलले बैंकिङ कसुरमा मुद्दा दायर गरेको हो।
यस घोटालाको अनुसन्धान गर्न केन्द्रीय अनुसन्धान ब्युरो (सिआइबी)को टोली नेपालगञ्ज पुगेको थियो। नेपालगञ्जमा बसेर उक्त टोलीले गत साता अनुसन्धान सकाएको हो।
बैंकबाट तीन अर्ब २० करोड भन्दा बढी रकम अपचलन भएको अनुसन्धानबाट खुलेको हो।
अभियोगपत्रमा उल्लेख भएको विवरण अनुसार एक अर्ब ११ करोड ९१ लाख ६३ हजार रुपैयाँ अन्य बैंकबाट नगद ल्याएर बैंकमा दाखिला नै नगरी अपचलन गरेको भेटिएको छ।
अन्य बैंकमा जम्मा गर्न पठाएको १५ करोड ३० लाख रुपैयाँ बैंकमा दाखिला नगरेको भेटिएको अभियोगपत्रमा उल्लेख छ।
यसरी विभिन्न शीर्षकमा अपचलन भएको सिआइबीको अनुसन्धानमा देखिएको हो।
उक्त बैंकमा एक लाख निक्षेपकर्ताहरू छन्। बैंक सस्याग्रस्त घोषणा भएपछि नेपाल राष्ट्र बैंकले नै चलाइरहेको छ।
रकम अपचलन भएका शीर्षक र कुल बिगो।
-1746009348.jpg)
