अमेरिकी सेनाको कारबाहीमा सिरियामा इस्लामिक स्टेट (आइएस)का वरिष्ठ नेता र उनका दुई छोरा मारिएका छन्।
अमेरिकी सेनाको मध्यपूर्व कमान्डका अनुसार शुक्रबार आइएसका वरिष्ठ नेता धिया जावबा मुसलिह अल हरदानी तथा उनका दुई वयस्क छोराहरू अब्दुल्लाह धिया अल हरदानी र अबद अल रहमान धिया जावबा अल हरदानी मारिएका हुन्।
उनीहरु बसेको घरमा छापा मारेर अमेरिकी सेनाले उनीहरुलाई मारेको अमेरिकी मिडिया सिएनएनले जनाएको छ।
ती तीनै जना अमेरिकी सेना, गठबन्धन फौज र नयाँ सिरियाली सरकारका लागि खतरा मानिएको सेन्ट्रल कमान्डले जनाएको छ।
सैन्य कारबाही भइरहेको बेला त्यहीँ उपस्थित तीनजना महिला र तीनजना बालबालिकाहरू पनि रहेको र उनीहरू सुरक्षित रहेको सेन्ट्रल कमान्डले सार्वजनिक गरेको विज्ञप्तीमा भनिएको छ।
अमेरिकाले विगत केही वर्षदेखि सिरिया र इराकमा आइएसविरुद्ध आफ्ना साझेदारहरूसँग मिलेर अभियानहरू चलाउँदै आएको छ। तर, यसपटक जस्तो जमिनमै पुगेर गरिएको कारबाही भने कमै देखिएको भनेर सिएनएनले लेखेको छ।
सेन्ट्रल कमान्डका कमाण्डर जनरल एरिक कुरिल्लाले भने अब आइएसका 'आतंककारी'हरू सुरक्षित नभएको बताएका छन्।
'आईएसका आतङ्ककारी जहाँ भए पनि हामी उनीहरूलाई खोज्नेछौं। उनीहरू निदाउँदा, काम गर्दा वा लुक्दा पनि सुरक्षित छैनन्,' उनले भनेका छन्।
मे महिनामा अमेरिकाले इराकमा पाँच र सिरियामा एक गरी जम्मा ६ वटा कारबाहीमा दुई आईएस लडाकु मारिएका थिए भने दुई जना पक्राउ परेका थिए। पक्राउ परेकामध्ये एक जना नेता समेत थिए।
मार्च महिनामा इराकमै गरिएको हवाई कारबाहीमा आईएसका प्रमुख सञ्चालन प्रमुख र प्रतिनिधिमण्डलका नेता अब्दल्लाह मक्की मुसलिह अल-रिफाइ मारिएका थिए।
अप्रिलमा अमेरिका आफ्ना झण्डै आधा सेना सिरियाबाट फिर्ता ल्याउने प्रक्रिया सुरु गरेको थियो। पेन्टागनले यो निर्णयलाई आइएसको क्षमता कमजोर पार्न सफल भएको संकेतका रूपमा व्याख्या गरेको थियो।
हालैका हप्तामा ट्रम्प प्रशासनले सिरियामा रहेको समूह हायत तहरीर अल-शामलाई विदेशी आतङ्ककारी समूहको सूचीबाट हटाउने निर्णय लिएको छ। त्यससँगै ट्रम्पले सिरियामाथि लगाइएको अमेरिकी प्रतिबन्ध हटाउने कार्यकारी आदेशमा पनि हस्ताक्षर गरेका छन्।
-1746009348.jpg)
