बर्दिया जिल्ला अदालतमा बितेको आर्थिक वर्षमा सबभन्दा धेरै सम्बन्ध बिच्छेदका मुद्दा दर्ता भएको पाइएको छ।
बितेको आर्थिक वर्षमा जिल्ला अदालतमा ४१३ वटा सम्बन्धविच्छेदका मुद्दा परेको अदालतकी सूचना अधिकारी अमृता केसीले बताइन्।
बर्दियामा गत आर्थिक वर्षमा नयाँ मुद्दा १४५० दर्ता भएका थिए। बर्दिया जिल्ला अदालतमा अघिल्लो वर्षका जिम्मेवारी सरेका मुद्दाको संख्या ८०३ थियो। कुल २२५३ देवानी तथा फौजदारी मुद्दा परेका थिए।
गत आर्थिक वर्षमा दर्ता भएका नयाँ मुद्दाहरूमध्ये सबभन्दा धेरै ४१३ वटा सम्बन्धविच्छेदका मुद्दा परेका थिए। ४१३ वटा सम्बन्धविच्छेदका मुद्दामध्ये ३५६ मुद्दा अदालतले फर्छ्यौट गरिसकेको छ। अब सम्बन्ध बिच्छेदका ५७ मुद्दा फर्छ्यौट हुन बाँकी रहेको सूचना अधिकारी केसीले बताइन्।
त्यस्तै फौजदारी मुद्दातर्फ सबभन्दा धेरै १४८ वटा लागुऔषधका मुद्दा बितेको वर्षमा परे। तीमध्ये अदालतले १३५ मुद्दा फर्छ्यौट गरेको भने अब त्यस्ता १३ मुद्दा बाँकी रहेका छन्। नेपाल–भारत बीचको खुला सिमानाका कारण अवैध रूपमा लागुऔषधका कारोबारी बढेको अदालतको ठम्याइ छ। पछिल्लो समय बर्दियामा दिनहुँ जसो प्रहरीले लागुऔषधका प्रयोगकर्ता र कारोबारी पक्राउ गर्दै आएको बताउँछ।
त्यसपछि बर्दियामा ४९ वटा जबरजस्ती करणीका मुद्दा बितेको वर्षमा परे। तीमध्ये ३२ मुद्दा अदालतले किनारा लगाएको छ। अब १७ मुद्दा फर्छ्यौट हुन बाँकी रहेको अदालतकी सूचना अधिकारी केसीले बताइन्।
सूचना अधिकारी केसीका अनुसार गत आर्थिक वर्षमा बर्दिया अदालतले लक्ष्यभन्दा बढी मुद्दा फर्छ्यौट गर्न सफल भएको छ।
अदालतले आर्थिक वर्ष २०८१/०८२ मा १५३६ मुद्दा फर्छ्यौट गर्ने वार्षिक लक्ष्य राखेको थियो। अदालतबाट लक्ष्यभन्दा १७१७ मुद्दा फर्छ्यौट भएका छन्। अदालतले गत वार्षिक वर्षमा लक्ष्यभन्दा १८१ बढी मुद्दा फर्छ्यौट गर्न सफल भएको सूचना अधिकारी केसीले बताइन्। अब ५३६ मुद्दा फर्छ्यौट हुन बाँकी छन्। बर्दिया जिल्ला अदालत बितेको आर्थिक वर्षमा ७६.२० प्रतिशत मुद्दा फर्छ्यौट गर्न सफल भएको छ।
सूचना अधिकारी केसीका अनुसार विभिन्न मुद्दाका कसुरदारहरूबाट अदालतले १०२७ वर्ष १ महिना २३ दिन कैद असुल गरेको छ भने १००३ सय ८३ वर्ष ७ महिना २४ दिन कैद असुलउपर गर्न अझै बाँकी छ। विभिन्न मुद्दाका कसुरदारबाट कुल २४१० वर्ष ९ महिना १० दिन कैद लगत असुल हुनुपर्ने थियो।
त्यस्तै अदालतले कसुरदारबाट जरिवानातर्फ २ करोड ८४ लाख ५३ हजार ४ सय ९६ रुपैयाँ असुलउपर भएको छ। अझै १२ करोड ५६ लाख ६८ हजार ११ रुपैयाँ जरिवाना असुल हुन बाँकी छ।
अदालतकी सूचना अधिकारी अमृता केसीका अनुसार विभिन्न कसुरदारबाट जरिवानातर्फ कुल लगत १५ करोड ४१ लाख २१ हजार ५ सय ७ रुपैयाँ असुल हुनु पर्ने थियो।
-1746009348.jpg)
