पाल्पाको पूर्वखोला गाउँपालिका–५ मा गाडी दुर्घटना हुँदा दुई जनाको मृत्यु भएको छ।
सोमबार साँझ आर्यभञ्ज्याङदेखि रामपुरतर्फ जाँदै गरेको लु१च ६७५६ नम्बरको गाडी (जिप) वीरकोटस्थित आर्यभञ्ज्याङ–रामपुर कच्ची सडकखण्डमा दुर्घटना भएको हो। सो गाडीले अन्डा बोकेको थियो।
जिल्ला प्रहरी कार्यालयका प्रहरी नायब उपरीक्षक सुनिल मल्लका अनुसार दुर्घटनामा परी दुई जनाको मृत्यु भएको छ भने एक जना घाइते छन्।
मृत्यु हुनेमा सवारीधनी बगनासकाली गाउँपालिका–१ गाप्टुङ घर भई हाल बुटवल उपमहानगरपालिका–११ मझुवा बस्दै आएका ४६ वर्षीय विनोद ढुंगाना र अर्का नाम थर नखुलेका अन्दाजी ४५ वर्षीय पुरूष छन्।
ढुंगानाको लुम्बिनी मेडिकल कलेज प्रभासमा उपचारका क्रममा र अर्काको मिसन अस्पताल पाल्पामा मृत्यु भएको हो।
गाडी चालक बुटवल उपमहानगरपालिका–११ का ३० वर्षीय राजु खड्का गम्भीर घाइते भएका छन्।
खड्काको लुम्बिनी मेडिकल कलेज प्रभासमा उपचार भइरहेको छ।
गाडी सडकदेखि ३०० मिटर तल खसेको छ। दुर्घटनाको कारण भने खुल्न सकेको छैन। घटनाको विषयमा थप अनुसन्धान भइरहेको प्रहरीले जनाएको छ।
