कम्तिमा २७१ जनाको ज्यान जाने गरी बिहीबार भएको जहाज दुर्घटनामा अर्को एउटा संयोग सार्वजनिक भएको छ।
भारतको गुजरातस्थित अहमदाबादबाट लन्डन उडेको एयर इन्डियाको जहाजमा चालक दलसहित २४२ जना सवार थिए। तीमध्ये कम्तिमा २४१ जना र होस्टलका विद्यार्थी तथा सर्वसाधारणसमेत गरी अहिलेसम्म २७१ जनाको मृत्यु पुष्टि भइसकेको छ।
उक्त जहाज उड्नेबित्तिकै विमानस्थल छेउमा रहेको डाक्टरहरूको होस्टलमाथि खसेको थियो। त्यही होस्टलका भान्से रवि ठाकुर र उनकी श्रीमती भने आफू बस्ने घरैमाथि जहाज खस्दा पनि बाँचेका छन्।
सुरूमा त उनीहरूले पनि ज्यान गुमाए भन्ने धेरैको आकलन थियो। तर भएछ के भने, उनीहरू जहाज खस्नुभन्दा केही बेरअघि मात्र कामले होस्टलबाट निस्केका रहेछन्।
अन्तर्राष्ट्रिय समाचार संस्था रोयटर्सका अनुसार जहाज दुर्घटना हुनुभन्दा करिब आधा घन्टाअघि रवि ठाकुर र उनकी श्रीमती वरपरका घरमा बिहानको खाना (लन्चबक्स) डेलिभर गर्न होस्टलबाट निस्केका रहेछन्।
तर आफूहरू सकुशल रहे पनि पनि यो दुर्घटनाले रवि ठाकुर र उनकी श्रीमतीलाई जिन्दगीभरि नभुल्ने चोट दिएको छ।
उनीहरू लन्चबक्स डेलिभर गर्न जाँदा साढे दुई वर्षकी छोरी र आमा दुवै होस्टलमा थिए। दुर्घटनापछि उनीहरू हराइरहेका छन्। उद्धार टोलीले जहाज खसेर ज्यान गुमाएका वा घाइते भएका व्यक्तिको खोजी जारी राखेको छ। हजुरआमा र नातिनीलाई भने अहिलेसम्म फेला पार्न सकेको छैन।
ठाकुर र उनकी श्रीमती लन्चबन्च बाँड्न बाहिर निस्कँदा उनकी आमा भान्सामा खाना पकाउँदै थिइन्। दुई वर्षकी छोरीलाई उनीहरूले झोलुंगामा सुताएर आएका थिए।
जहाजभित्रकै एक यात्रु सकुशल बाहिर निस्केको खबर बाहिरिएपछि रवि ठाकुर आफ्नी आमा र छोरी पनि त्यसैगरी फेला पर्ने आसमा छन्।
जहाजको ११ए सिटमा बसेका यात्रुको भने जीवित उद्धार गरिएको थियो। भारत सरकारले सार्वजनिक गरेको सूचीअनुसार ११ए सिटमा बसेका यात्रु बेलायती नागरिक विश्वासकुमार रमेश थिए। उनी अस्पतालमा उपचारमा छन्। उनको छाती, आँखा र खुट्टामा गहिरो चोट लागेको छ।
'म पनि त्यस्तै अर्को चमत्कारको प्रतीक्षामा छु,' रवि ठाकुरलाई उद्धृत गर्दै रोयटर्सले लेखेको छ, 'जहाजमा सवार ती बेलायती नागरिकजस्तै मेरी आमा र छोरी पनि सकुशल फेला पर्लान् कि भन्ने आसमा छु।'
ठाकुरका अनुसार उनले जहाज दुर्घटना हुँदा ठूलो आवाज सुनेका थिए। सुरूमा उनलाई ग्यास सिलिन्डर पड्केको हो कि भन्ने लाग्यो। तर केही बेरमै उनले आकाशमा आगो र धुँवाको मुस्लो देखे।
'जहाज आफ्नै होस्टलमाथि खस्यो भन्ने थाहा पाएपछि हामी दौडादौड फर्केर आयौं। घर आगो र धुवाँले ढाकिएको थियो,' उनले भने, 'त्यसयता म हरेक दिन आमा र छोरीको खोजीमा अस्पतालहरू चहारिरहेको छु।'
एयर इन्डियाका अनुसार लन्डनको ग्याटविक विमानस्थल जाँदै गरेको जहाजमा १६९ जना भारतीय नागरिक, ५३ जना बेलायती, ७ जना पोर्चुगिज र १ जना क्यानाडेली नागरिक सवार थिए।
