सहिद धर्मभक्त राष्ट्रिय प्रत्यारोपण केन्द्र, भक्तपुरमा केन्द्रमा मस्तिष्क मृत व्यक्तिबाट प्राप्त मिर्गौला र कलेजो एकै व्यक्तिमा प्रत्यारोपण गरेका व्यक्ति प्रत्यारोपणको १९ औं दिनमा डिस्चार्ज भएका छन्।
शिव महर्जन कलेजो र मिर्गौला प्रत्यारोपण भएर डिस्चार्ज भएका हुन्।
मस्तिष्क मृत्युबाट मिर्गौला प्रत्यारोपण भएकी फूलमाया नेपाली एक हप्ताअघि (जेठ १४ गते) नै डिस्चार्ज भइसकेकी छन्।
उक्त प्रत्यारोपणका नेतृत्व शल्य चिकित्सक डा. पुकार चन्द्र श्रेष्ठले गरेका थिए भने नेफ्रोलोजी विभाग प्रमुख डा.कल्पना कुमारी श्रेष्ठ, युरोलोजी विभाग प्रमुख डा. दिपेश श्रेष्ठ, एनेस्थेसिया तथा क्रिटिकल केयर विभाग प्रमुख डा. आरती राई, प्याथोलोजी विभाग प्रमुख डा.सबिना श्रेष्ठ, रेडियोलोजी विभाग प्रमुख डा. कृष्ण बुढाथोकी, कार्डियोलोजी विभाग प्रमुख डा. प्रवेश न्यौपाने, तथा नर्सिङ्ग निर्देशक पुजा कोइरालाको टोलीले उक्त कार्य सम्पन्न गरेको हो।
यसैगरी विभिन्न अस्पतालबाट प्रत्यारोपण सर्जन डा. रोशन घिमिरे, सघन उपचार विशेषज्ञ डा. सुवास आचार्य र इन्टरभेन्सन रेडियोलोजिष्ट डा. दिनेश चटौत तथा कलेजो प्रत्यारोपण फिजिसियन डा. शेखर पौड्यालले सघाएका थिए।
दुबै अंग प्रत्यारोपणपश्चात सकुशल डिस्चार्ज भएका प्रत्यारोपित शिव महर्जन र उनका परिवारले यस्तो जटिल शल्यक्रिया न्यूनतम शुल्कमा यति छिटो नेपालमै प्रत्यारोपण हुन सक्छ भनेर कल्पना नै गर्न नसकेको र सपना जस्तै लागिरहेको बताए।
डा. पुकारको नेतृत्वमा केन्द्रबाट प्रदान गरिएको सेवा विश्वस्तरीय रहेको र आफूहरू पूर्ण रूपमा सन्तुष्ट रहेको उल्लेख गर्दै उनले अंग फेल भएका नेपाली दाजुभाइ दिदी-बहिनीहरूलाई आफ्नै देशको सेवामा आश्वस्त हुन आग्रह गरे।
