दाङको तुलसीपुर उपमहानगर-६ बरूवाकी २२ वर्षीया सुजाता चौधरी शनिबार दिउँसो पैदल हिँडिरहेकी थिइन्। पब्लिक ज्ञान ज्योति कलेजमा बिए तेस्रो वर्ष पढ्ने उनी काम विशेषले नजिकैको मामाघर जाँदै थिइन्।
एक जना युवक मोटरसाइकलमा आएर सुजाताको नजिकै रोकिए, तर मोटरसाइकलको स्टार्ट भने बन्द गरेका थिएनन्।
‘दिदी, मलाई इमर्जेन्सी छ, एकछिन फोन गर्न तपाईंको मोबाइल दिनुहोस् न,’ भने। ती युवकले आफूसँग मोबाइल नभएको र दाजु एक्कासि बिरामी परेका कारण अस्पतालमा पुर्याइएको कुरा गरे।
सुजाता विश्वासमा पर्छिन्। सहयोग गर्न खोज्दै मोबाइल दिन्छिन्। जब ती युवकले मोबाइल पाउँछन्, उनी मोटरसाइकल हाँकेर अगाडि बढ्छन्। सुजाता ‘मोबाइल-मोबाइल...’ भन्दै केहीबेर मोटरसाइकलको पछि दौडिन्छिन्। तर भेट्टाउन सक्दिनन्। उनी निराश हुँदै घर फर्किन्छिन्।
अर्को यस्तै घटना ग्रामीण भेग तुलसीपुर-१६ साइपुरकी २३ वर्षीया नारायणी सापकोटामाथि पनि भएको थियो।
सापकोटा दुध लिन घरदेखि झन्डै डेढ सय मिटर उत्तरको चोकमा पैदल हिँडिरहेकी थिइन्। एक युवकले रोक्दै बाटो सोध्छन् र आफ्नो आमा बिरामी भएको कारण फोन गर्न मोबाइल माग्छन्। नारायणीले मोबाइल दिन मान्दिनन्। ‘ब्यालेन्स छैन’ भन्दै बहाना बनाउँछिन्।
त्यतिकैमा पछाडिबाट अर्का युवक मोटरसाइकलमा आई मोबाइल खोसेर भाग्छन्। नारायणीलाई गफमा अल्झाउने र पछाडिबाट अर्को युवकले मोबाइल थुत्ने योजना अन्तर्गत दुवै जना मोटरसाइकलमा भाग्छन्। दिउँसै पनि एक्लो ठाउँ भएकाले नारायणीको आवाज सुन्ने कोही थिएन। चिच्याउँदै दौडिए पनि उपाय लाग्दैन।
सल्यानको बागचौर नगरपालिका-९ डाँगी गाउँका १८ वर्षीय हरिबहादुर डाँगीमाथि वैशाख २५ गते राति साढे ९ बजे यस्तै घटना भयो।
उनी राप्ती-बबई क्याम्पस नजिकै पैदल हिँडिरहेका थिए। एक जना युवक मोटरसाइकलमा आएर हरिको अघि रोकिए। हरिसँग ती युवकले मोबाइल मागे। साथीलाई लिन आएको र आफ्नो मोबाइल अफ भएको भन्दै बहाना बनाए।
हरिले विश्वास गरेर उनलाई मोबाइल दिए। तर लगत्तै उनी मोबाइल लिएर भाग्न खोजे। त्यतिकैमा हरिले बाइकलाई समाउन समेत खोजे तर हरि भुँइमा पछारिए। अन्तत: ती पुरूष मोटरसाइकलमा फरार भए।
दिनदहाडै मोबाइल लुटेको भन्दै तीनै जनाले इलाका प्रहरी कार्यालय तुलसीपुरमा खबर गरेका थिए। त्यसपछि कार्यालयले अनुसन्धान अघि बढाएको थियो।
इप्रका तुलसीपुरका प्रमुख अनिल ठकुरीले प्राविधिक र म्यानुअल रूपमा अनुसन्धान सुरू गरे।
उनले तुलसीपुरका सबै मोबाइल पसलका सञ्चालकहरूलाई एउटा ग्रुपमा र अर्को ग्रुपमा कवाड व्यवसायीहरूलाई जोडे। मोबाइल लुटपाटका घटना हुन थालेकोबारे जानकारी गराइएको थियो।
एक दिन हरिको मोबाइल लिएर एक पसलेकहाँ ती पुरूष पुगेका थिए। उनले आफ्नो मोबाइलको पासवर्ड बिर्सिएको बहाना बनाए। पसलेले तुरून्तै यसबारे प्रहरीलाई जानकारी त गराए। तर ती पुरूष भागे।
ती पुरूषले योसँगै अर्को पनि अपराध गरिरहेका थिए। डिएसपी ठकुरीका अनुसार उनले ती चोरीका मोबाइल लिएर आफन्तहरूसँग रकम समेत असुली गरिरहेका थिए।
सुजाताको मोबाइल प्रयोग गरी उनका साथीहरूबाट १५ हजारभन्दा बढी रुपैयाँ लिइसकेका थिए।
‘मेरो फेसबुकमा जोडिएका लगभग सबैसँग उसले त्यसैगरी पैसा मागेको रैछ,’ सुजाताले भनिन्।
अनुसन्धानकै क्रममा ती पुरूष पहिचान भएपछि आइतबार प्रहरीले पक्राउ गरेको छ।
प्रहरीले तुलसीपुर-६ बरुवा गाउँकै २५ वर्षीय अमृत चौधरीलाई घरबाटै नियन्त्रणमा लिएको डिएसपी ठकुरीले बताए। लुटेर लगेको सुजाताको मोबाइल पनि अमृतको घरको कोठाबाटै बरामद भएको थियो।
एक डेढ महिनाको अनुसन्धानपछि मात्रै अमृत पक्राउ परेको उनले बताए।
प्रहरी हिरासतमा रहेका अमृतले यो अवधिमा झन्डै एक दर्जन व्यक्तिको मोबाइल लुटिसकेको बयान दिएका छन्। अमृत पक्राउ परेपछि विभिन्न पीडितहरू प्रहरीको सम्पर्कमा आएको जनाएको छ।
