सर्लाहीमा टिपरको ठक्करबाट मोटरसाइकलमा सवार युवकको मृत्यु भएको छ।
शनिबार सर्लाहीको बागमती गाउँपालिका-१ पानी ट्यांकी चोकस्थित पूर्वपश्चिम राजमार्ग सडक खण्डमा बालुवा लोड भएको टिपरले मोटरसाइकललाई ठक्कर दिँदा मोटरसाइकलमा सवार एक जनाको मृत्यु भएको हो।
मृत्यु हुनेमा सर्लाहीको मलंगवा नगरपालिका-१० का २१ को मोहमद कैफ मिकरानी छन्।
बिहान सवा १० बजे उनी र मलंगवा-१० कै ४ को सुमितकुमार यादव सवार बा ६६ प ८४६० नम्बरको मोटरसाइकललाई ना ७ ख ६३९१ नम्बरको टिप्परले ठक्कर दिएको थियो।
टिपरको ठक्करबाट गम्भीर घाइते भएका दुवैजनालाई उपचारका लागि एलएस न्युरो अस्पताल बारा पठाइएको थियो।
उपचारका क्रममा शनिबार मध्याह्न १२:१० बजे मिरानीको मृत्यु भएको सर्लाही प्रहरीले जनाएको छ।
टिपर चालक सर्लाहीको बागमती नगरपालिका-२ का ३४ वर्षीय उदव मोक्तानलाई नियन्त्रणमा लिएर दुर्घटनाबारे थप अनुसन्धान अगाडि बढाइएको प्रहरीले जनाएको छ।
-1742801159.jpg)
