दाङ जिल्ला अदालतले बिहीबार एकै दिन तीन वटा बालात्कार मुद्दाको फैसला सुनाएको छ।
तीन जना फरक फरक न्यायाधीसको इजलासले गरेको फैसलामा तीन जनामध्ये दुई जनालाई समान दश वर्ष र अर्का एक जनालाई नौ वर्ष कैद सजायको फैसला भएको छ।
सल्यान जिल्लाको वनगाड कुपिन्डे नगरपालिका–९ रातामाटा का ३८ वर्षीय कुलबहादुर बस्नेतलाई दश वर्ष कैद भएको छ।
जिल्ला न्यायाधीश लालसिंह थापाको इजलासले दश वर्ष कैद, पाँच लाख जरिवाना, २५ हजार पीडितलाई क्षतिपूर्ति र २० हजार पीडित राहत कोषमा जम्मा गर्न फैसला गरेको अदालतका सूचना अधिकारी गोकर्ण वलीले बताए।
अदालतले बस्नेतविरूद्ध वैशाख ४ गते कसुर कायम गरेको थियो भने वैशाख ८ गते फैसला सुनाएको हो।
तुलसीपुर क्षेत्रकी एक जना १६ वर्ष ५ महिनाकी नाबालिकालाई बलात्कार गरेको किटानी जाहेरी परेको थियो।
बस्नेतले ०८० चैत २५ गते राति भएको बालात्कारबारे पीडितले जाहेरी दिएपछि बस्नेत तुलसीपुरबाट पक्राउ परेका थिए। बस्नेतका विरूद्ध २०८१ वैशाख १६ गते जबर्जस्तीकरणी सम्बन्धी मुद्दा चलेको थियो।
त्यस्तै बिहीबार नै अर्कौ छुट्टै बलात्कार मुद्दामा तुलसीपुर – १६ घर भई तुलसीपुर– ४ मा बस्दै आएका कर्णबहादुर केसीलाई जिल्ला अदालतले दश वर्षको कैद सजायको फैसला सुनाएको छ।
न्यायाधीश प्रतिमा पोख्रेल भट्टराईको इजलासले केसीलाई दश वर्ष कैद र पीडित राहात कोषमा ५० हजार जम्मा गर्न फैसला सुनाएको हो। एक जना सुस्त मनस्थितिकी महिलामाथि बलात्कार गरेको उजुरीपछि केसी पक्राउ परेका थिए। उमेर पुगेको भए पनि सुस्त मनस्थितिकी महिलामाथि बलात्कार गरेको हुँदा केसीलाई थप पाँच वर्ष सजाय थपेर दश वर्ष कैद सजाय भएको अदालतका सूचना अधिकारी वलीले बताए।
२०७३ माघ ३ गते केसीले सुस्त मनस्थितिकी महिलामाथि बलात्कार गरेको प्रहरीमा उजुरी परेको थियो। कर्णबहादुर वली हाल फरारकै सूचीमा छन्।
त्यस्तै गढवा गाउँपालिका – ४ का ५२ बर्षीय लाहानु चौधरीलाई बलात्कार मुद्दामा नौ वर्ष जेल सजाय तोकेको छ।
न्यायाधीश तेजनारायण पौडेलको इजलासले बिहीबार चौधरीलाई नौ बर्ष कैद सजाय, ५० हजार पीडितलाई क्षतिपूर्ति र एक हजार ६ सय पीडित राहतकोषमा जम्मा गर्न फैसला सुनाएको थियो।
अदालतका सूचना अधिकारी गोकर्ण वलीका अनुसार चौधरीले एक जना बोल्न नसक्ने महिलालाई २०७६ माघ २० गते बलात्कार गरेको उजुरी प्रहरीमा परेको थियो। चौधरी पनि हाल फरारकै सूचीमा छन्।
-1742801159.jpg)
