शुक्रबार दिउँसो अचानक चलेको हावाहुरीका कारण कपिलवस्तु र नवलपरासीमा तीन जनाको मृत्यु भएको छ।
हावाहुरीले रूख र प्रतीक्षालय ढल्दा नवलपरासीको सुनवलमा दुई जना र कपिलवस्तुमा एक जनाको मृत्यु भएको प्रहरीले जनाएको छ।
जिल्ला प्रहरी कार्यालय नवलपरासीका प्रमुख प्रहरी उपरीक्षक अनुपम श्रेष्ठका अनुसार नवलपरासी सुनवल नगरपालिका वडा नम्बर ७ चारपाला बस्ने अन्दाजी ३० वर्षीया मिरा बयम्बु र ४० वर्षीय दुर्गा बहादुर पुनको मृत्यु भएको हो।
प्रहरी उपरीक्षक श्रेष्ठका अनुसार चारपालास्थित भित्री सडक खण्डमा हावाहुरीका कारण बाटोको साइडमा रहेको कंक्रिटको सिमेन्ट र रडबाट निर्मित प्रतीक्षालय माथि बर्रोको रूख ढलेर प्रतीक्षालय भत्किँदा उक्त घटना भएको हो।
दिउँसो सवा चार बजेतिर भएको उक्त घटनामा परी स्थानीय ४० वर्षीया नरमति परियार, ५१ वर्षीय दुर्गेश्वरा खाम्चा मगर र २२ वर्षीय अनिल थापा घाइते भएका छन्। घाइते तीनै जनाको अवस्था गम्भीर रहेको प्रहरी उपरीक्षक श्रेष्ठले जानकारी दिए।
घाइतेहरूको रूपन्देहीको भलुहीस्थित देवदह मेडिकल कलेजमा उपचार भइरहेको छ।
यस्तै, कपिलवस्तुको कपिलवस्तु नगरपालिका वडा नम्बर ८ मैनिहवामा आँपको रूख ढलेर च्यापिँदा एक बालिकाको मृत्यु भएको छ।
जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक मोहनमणि अधिकारीका अनुसार हावाहुरीका कारण आँपको रूख ढलेर च्यापिँदा स्थानीय १४ वर्षीय सुखना केवटको मृत्यु भएको हो।
हावाहुरी चलेपछि भुइँमा झरेका आँप टिप्न गएकी सुखनाको सोही आँपको रूख ढल्दा च्यापिएर मृत्यु भएको प्रहरी नायब उपरीक्षक अधिकारीले जानकारी दिए।
उक्त घटनामा गम्भीर घाइते भएकी सुखनाको जिल्ला अस्पताल तौलिहवामा पुर्याएपछि चिकित्सकले मृत घोषणा गरेका थिए।
शुक्रबार दिउँसो लुम्बिनी प्रदेशका तराईका जिल्लामा ठूलो हावाहुरी र पानी परेको थियो। हावाहुरीका कारण अन्य क्षेत्रमा कहाँ कति क्षति भयो भन्ने बारे सूचना संकलन भइरहेको प्रहरीले जनाएको छ।
