४६ वर्षीय अन्जनी बयलकोटी, केही वर्षदेखि काठमाडौंको तारकेश्वर क्षेत्रमा बस्दै आएका छन्।
गोरखा भिमसेनथापा गाउँपालिका-१ का उनले तारकेश्वर नगरपालिका-७ को फुटुङमा साढे ३ तले घर बनाए।
त्यही घर नजिकै उनले एउटा फ्ल्याटमा काम गर्थे। दुई जना कर्मचारी राखेर उनले प्रिन्टिङ प्रेस सञ्चालन गरिरहेका थिए।
उनीसँगै ओखलढुंगा घर भई बुढानीलकण्ठ-१२ बस्ने २८ वर्षीय निर्मल खड्का र मकवानपुर घर भई चन्द्रागिरि बस्ने २३ वर्षीया अन्जु खत्री पनि काम गर्थे।
खड्का ग्राफिक डिजाइनर हुन् भने अरू कागजात बनाउन खत्रीले पनि सहयोग गर्थिन्। उनीहरूले १० देखि १५ हजार रूपैयाँसम्म मासिक तलब पाइरहेका थिए।
-ink-1747304910.jpeg)
उनीहरूले सञ्चालन गरेको प्रिन्टिङ प्रेस बाहिर कुनै बोर्ड वा नाम राखिएको थिएन। किनभने उनीहरूले अवैध रूपमा कागजातहरू बनाउँथे। काठमाडौं उपत्यका अपराध अनुसन्धान कार्यालयको टोलीले बुधबार उनीहरू तीनै जनालाई पक्राउ गरेको हो।
उनीहरूबाट प्रहरीले थुप्रै कागजात पनि बरामद गरेको छ। यसरी प्रहरीले उनीहरूलाई पक्राउ गरेर बिहीबार पत्रकार सम्मेलनमार्फत् सार्वजनिक गरेको हो।
'जस्तो खालको पनि सरकारी कागजातको हुबहु नक्कली बनाउने गिरोह पक्राउ गरेका छौं,' कार्यालय प्रमुख एसएसपी रमेशकुमार बस्नेतले जानकारी दिए।
अन्जनीले गैरकानुनी रूपमा सरकारी कागजातहरू कीर्ते गर्ने गरेको सूचना प्रहरीले पाएको थियो। यो सूचना प्रहरीले १०/११ दिन अघि नै पाएको थियो।
'सूचना केही समयअघि नै पाएका थियौं। तर यो मान्छेले ठाउँ सारिरहने रहेछ। अस्ति एक ठाउँ गएका थियौं। तर त्यहाँबाट फेरि अर्कै ठाउँमा सरिसकेको रहेछ,' अनुसन्धानमा खटिएका प्रहरीले भने।
अपराध अनुसन्धान कार्यालयले यसलाई 'अपरेसन फोस्टर डेल्टा' को नाम दिएको थियो। अनुसन्धानकै क्रममा डिएसपी रोशन खड्का नेतृत्वको टोली बुधबार दिउँसो उनले प्रेस सञ्चालन गर्दै गरेको फ्ल्याटमा पुगेको थियो।
'उनको घरबाट मुनितिर रहेको अर्को घरमा एउटा फ्ल्याट भाडामा लिएर काम गरिरहेको रहेछ। उनले घर पनि यही कामबाट बनाएको हुनसक्छ,' अनुसन्धानमा संलग्न ती अधिकारीले भने, 'घर र काम गर्ने फ्ल्याट अनकन्टार ठाउँमा छ।'
अन्जनीले विगत ८ वर्षदेखि सरकारी, गैरसरकारी कार्यालय, विभिन्न तहका सरकारका कागजातहरू बनाइदिन्थे।
यसो त उनले शैक्षिक संस्थाका प्रमाणपत्र, जग्गाधनी पुर्जा, सवारी चालक अनुमति पत्र, ग्रिन कार्ड लिन चाहिने विभिन्न अस्पतालका नक्कली कार्ड पनि बनाउने गरेको पाइएको छ।
प्रहरीले उनको फ्ल्याटबाट विभिन्न प्रिन्टिङ मेसिन पनि बरामद गरेको छ।
प्रवक्ता एवं एसपी काजीकुमार आचार्यले उनीहरूले बनाउने नक्कली लाइसेन्स विशेषगरी विदेश जानेहरूका लागि बेच्ने गरेको बताए।
'विशेषगरी अस्ट्रेलिया जानेहरूका लागि यो लाइसेन्स बनाउने गरेको देखियो। उनलाई लाइसेन्स बनाउन लगाएर, यहाँबाट अष्ट्रेलियासम्म लिएर जाने रहेछन्। त्यहाँ अर्को लाइसेन्स झिकेपछि यो फ्याँक्ने रहेछन्,' उनले भने, 'उनले लाइसेन्सको प्रिन्ट निकाले पनि चिप भने राखेको पाइएन।'
-ink-1747304911.jpeg)
यस्तै उनले डिपेन्डेन्ट भिसाका लागि नक्कली विवाह दर्ता प्रमाणपत्र, बैंकका स्टेटमेन्टहरू पनि हुबहु निकालेको एसपी आचार्यले बताए।
अन्जनीले यो काम सुरूमा अर्कै व्यक्तिको प्रेसमा एजेन्ट बनेर काम गरेका थिए।
'केही वर्ष उनले अरूकोमा काम गरेका रहेछन्। त्यहाँ काम सिक्ने र एजेन्ट भएपछि उनले आफ्नै काम सुरू गरे। त्यही लिंकले उनको काम भइरहेको रहेछ,' अनुसन्धानमा संलग्न प्रहरीले भने।
प्रहरीले उनीहरूलाई पक्राउ गरी थप अनुसन्धान गर्न बरामद भएका नक्कली कागजात, उपकरणहरूसहित जिल्ला प्रहरी परिसर काठमाडौं पठाउने तयारी छ।
उनीहरूमाथि लिखतसम्बन्धी कसुरमा अनुसन्धान हुनेछ।
तस्बिरहरू:
-ink-1747304912.jpeg)
-ink-1747304911.jpeg)
-ink-1747304910.jpeg)
-ink-1747304910.jpeg)
-ink-1747304910.jpeg)
-ink-1747304909.jpeg)
-ink-1747304909.jpeg)
