रौतहटको एक सुधार केन्द्रमा युवकमाथि कुटपिट गरेको भिडिओ बाहिरिएपछि प्रहरीले अनुसन्धान थालेको छ।
सोमबार बिहान गौर नगरपालिका-४ मा रहेको सुधार केन्द्रको एउटा भाइरल भएपछि प्रहरीको टोली खटिएको जिल्ला प्रहरी कार्यालय रौतहटका एसपी नेत्रमणि गिरीले जानकारी दिए।
उनका अनुसार कार्यालयबाट डिएसपी नेतृत्वको टोली घटनास्थलतर्फ गएको छ।
जिल्ला प्रशासन कार्यालय रौतहटबाट पनि सहायक सिडिओ नेतृत्वको टोली खटिएको छ।
‘भिडिओ आएको थाहा पाएपछि टोली खटिएको छ। त्यहाँ पुगेर के भएको हो भन्नेबारे बुझ्ने काम भइरहेको छ,’ उनले भने।
भुइँमा तीन जनाले एक जना युवकलाई समातेर पाइपले पैतालामा हिर्काएको भिडिओ अहिले सामाजिक सञ्जालमा भाइरल बनेको छ।
उक्त भिडिओ कहिले खिचिएको भन्ने खुलिसकेको छैन।
