अमेरिकी राष्ट्रपति डोनाल्ड ट्रम्पसँगको निकटताका कारण इलन मस्कको टेस्ला कम्पनीको कार बिक्री र शेयरको भाउ घटे पनि उनको सञ्चार कम्पनी स्टारलिंकलाई भने धेरै फाइदा भएको छ।
सरकारी सेवा प्रभावकारी बनाउन ट्रम्पले खोलेको डिपार्टमेन्ट अफ गभर्नमेन्ट इफिसियन्सी (डोज)को प्रमुखका रूपमा मस्कले गरेको कामका कारण यो वर्षको पहिलो त्रैमासमा टेस्लाको नाफा ७१ प्रतिशत घटेको गत हप्ता सार्वजनिक भएको थियो। त्यसपछि मस्कले अब आफ्नो ध्यान टेस्लामा बढी केन्द्रित हुने घोषणा नै गरेका छन्।
तर धेरै कम्पनी चलाउने मस्कको सञ्चार कम्पनी स्टारलिंकलाई भने ट्रम्पसँगको निकटताका कारण धेरै फाइदा भएको अमेरिकी पत्रिका द वाशिङ्गटन पोस्टले लेखेको छ।
स्टारलिंकले मार्चमा विश्वको सबैभन्दा जनसंख्या भएको देश भारतका दुई ठूला इन्टरनेट प्रदायकहरूसँग वितरण सम्झौताहरू हासिल गर्यो। भारतको छिमेकी पाकिस्तानमा पनि त्यस्तो स्वीकृति पायो। अमेरिकाको अर्को प्रमुख व्यापारिक साझेदार भियतनामले स्टारलिंकलाई स्थानीय कम्पनीसँग साझेदारी गर्नुपर्ने नियम माफ गर्यो। स्टारलिंकसँग पाँच वर्षे पाइलट कार्यक्रम सुरू गर्ने बतायो।
अमेरिकाका लागि दोस्रो ठूलो गार्मेन्ट निर्यातक बंगलादेशले महिनौं सम्मको अवरूद्ध वार्तापछि स्टारलिंकसँग आफ्नै सम्झौता घोषणा गर्यो। लेसोथोमा पनि सरकारले लामो समयदेखि स्टारलिंकको विदेशी स्वामित्वप्रतिको जनाएको आपत्तिलाई त्यागेर कम्पनीलाई लाइसेन्स दियो भनेर पोस्टले जनाएको छ।
भारतीय उत्पादनमा भन्सार नलगाउन भनेर भारत सरकार ट्रम्पको दोस्रो कार्यकाल सुरू भए देखि नै उनी निकट धनाढ्य मस्कलाई खुसी पार्न लागेको छ।
फेब्रुअरीमा ट्रम्पलाई भेट्न अमेरिका गएका बेलामा भारतीय प्रधानमन्त्री नरेन्द्र मोदीले मस्कलाई पनि भेटेका थिए। मस्कलाई खुसी पारे ट्रम्पले भारतीय उत्पादनमा भन्सार नलगाउलान् भनेर मोदीले आफ्नो सरकारको नीति नै फेरेर टेस्लालाई भारतमा गाडी बेच्न सजिलो पार्न लागेका छन्। मस्ककै सञ्चार कम्पनी स्टारलिंकलाई पनि भारतमा इन्टरनेट सेवा बिस्तार गर्न दिइएको हो।
बंगलादेशको हकमा त व्यापार वार्ता गर्न अमेरिका पुगेका प्रतिनिधिसँग मस्कले भेटेरै स्टारलिंकलाई अनुमति नदिए अमेरिकामा गार्मेन्ट बेच्ने अप्ठ्यारो हुने संकेत गर्दै धम्की नै दिएको पोस्टले दावी गरेको छ। मस्ककै कारण स्थानीय सञ्चार कम्पनीले बंगलादेश सञ्चार नियामकलाई स्टारलिंकलाई अनुमति नदिन दबाव दिए पनि सो अनुमति दिइएको हो।
अरू देशले पनि मस्कलाई खुसी पारे ट्रम्प पनि खुसी हुन्छन् र धेरै उच्च भन्सार दर लगाउँदैनन् भन्ने आशामा भारत र बंगलादेशको जस्तै स्टारलिंकलाई अनुमति दिएका हुन्।
स्टारलिंक मस्कको अन्तरिक्ष कम्पनी स्पेस एक्सको अङ्ग हो। टेस्ला कम्पनीको भन्दा स्पेस एक्सको बजार भाउ थोरै छ। तर टेस्लामा मस्कको १३ प्रतिशतमात्रै शेयर छ भने स्पेस एक्समा उनको ४२ प्रतिशत शेयर छ। स्पेस एक्सको अङ्ग भएकाले करिब एक खर्ब ३५ अर्ब डलर बराबरको स्टारलिंक कम्पनीमा पनि उनको ४२ प्रतिशत शेयर छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1742801159.jpg)
