एप्पल कम्पनीले आगामी वर्ष सम्ममा अमेरिकीमा बिक्री हुने सबैजसो आइफोन भारतमा बनाउने छ।
अमेरिकी राष्ट्रपति डोनाल्ड ट्रम्पले चीनसँग व्यापार युद्ध सुरू गरेकाले एप्पलले भारतमा आइफोन उत्पादन बढाउन लागेको हो।
अमेरिकामा वर्षमा छ करोडभन्दा बढी आइफोन बिक्री हुन्छ। त्यसमध्ये धेरै जसो हाल चीनमा बन्छन्।
चीनसँगको व्यापार युद्धका कारण २०२६ को अन्त्य सम्ममा अमेरिकामा बिक्री हुने सबैजसो आइफोन भारतमा बनाउने लक्ष्य एप्पल कम्पनीले लिएको हो भनेर फाइनान्सीयल टाइम्सले लेखेको छ। त्यसको मतलब अहिले भारतमा भइरहेको उत्पादन बढाएर झण्डै दोब्बर पुर्याउनु पर्ने हुन्छ।
ट्रम्पले अप्रिल २ मा सबै देशलाई १० प्रतिशत भन्सार महसुल र प्रतिस्पर्धीहरूलाई उच्च रेसिप्रोकल महसुल लगाउने घोषणा गरेका थिए।
ट्रम्पले ७० वटाभन्दा बढी देशहरूलाई लगाएको पारस्परिक भन्सार भने ९० दिनका लागि रोके। ती देशहरूले अमेरिकी कर नीतिको विरोध नजनाएको, जवाफी भन्सार नलगाएको र छलफलका लागि तयार रहेको देखिएको भन्दै जुलाईको पहिलो सातासम्मका लागि रेसिप्रोकल भन्सार रोके। त्यतिन्जेलका लागि उनले सबै देशलाई विश्वव्यापी १० प्रतिशत भन्सार दर मात्रै लगाए।
चीनलाई लगाएको भन्सार दर भने नरोकेर पटक पटक बढाए। त्यसपछि पटक-पटक अमेरिका र चीनले जवाफी कदम चालेर थप महसुल लगाएका थिए। जसका कारण ट्रम्पको दोस्रो कार्यकालमा चिनियाँ वस्तुमा लगाएको भन्सार महसुल बढेर १४५ प्रतिशत पुगेको थियो। चीनले पनि जवाफमा अमेरिकी उत्पादनमा १२५ प्रतिशत भन्सार महसुल लगाएका थिए।
एप्पल लगायत ठूला कम्पनीहरूलाई धेरै नोक्सानी हुने भएकाले त्यसपछि चीनबाट आयात हुने स्मार्टफोन लगायत इलेक्ट्रोनिक्स सामानहरूमा ट्रम्पले रेसिप्रोकल दर नलगाउने घोषणा गरेका थिए।
सो घोषणाले एप्पल कम्पनीका लागि ठूलो संकट हालका लागि टरेको थियो।
एप्पलको सबभन्दा कमाइ हुने आइफोन मात्रै नभएर आइप्याड र म्याकबुकहरू मुख्यतः चीनमै बन्छन्।
ब्लुमबर्गका अनुसार करिब ८७ प्रतिशत आइफोन, ८० प्रतिशत आइप्याड र ६० प्रतिशत म्याकबुक चीनमा बन्छन्। त्यसैले चीनसँग ट्रम्पले व्यापार युद्ध चर्काएपछि एप्पल कम्पनीको सेयरको भाउ धेरै झरेको थियो।
एप्पल कम्पनीले भन्सारका कारण बढेको लागत उपभोक्तामाथि थोपरेको भए महँगो मोडलको आइफोनको मूल्य अमेरिकी उपभोक्ताका लागि करिब २,५०० डलर पुग्न सक्ने हुन्थ्यो।
हाल आइफोन १६ प्रो म्याक्स मोडलको १ टिबी स्टोरेज भएको फोनको रकम अमेरिकामा करिब १,६०० डलर पर्छ।
यस्तोमा अमेरिकी भन्सार तथा सीमा सुरक्षा विभागले सूचना जारी स्मार्टफोन, कम्युटर लगायतका इलेक्ट्रोनिक सामानहरूमा भन्सार छुट दिने निर्णयले एप्पललाई राहत भएको थियो।
हाललाई राहत भए पनि ट्रम्पले चीनसँगको व्यापार युद्ध झन् चर्काउने देखिएकाले एप्पलले अमेरिकामा बिक्री हुने प्राय सबै आइफोन आगामी वर्षसम्ममा भारतमा उत्पादन गर्ने लक्ष्य लिएको हो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1742801159.jpg)
