काठमाडौंमा मोबाइल लुटपाटमा संलग्न तीन जनालाई प्रहरीले पक्राउ गरेको छ।
जिल्ला प्रहरी परिसर काठमाडौंले तीन जनालाई पक्राउ गरी सोमबार सार्वजनिक गरेको हो।
पक्राउ पर्नेमा सिन्धुली सुनकोशी गाउँपालिका-१ घर भई जडिबुटी बस्ने १८ वर्षीय शिखरजंग थापा भन्ने नवराज सुनुवार, धनुषा घर भई बूढानीलकण्ठ बस्ने १८ वर्षीय राज निष्ट यादव र रौतहट घर भई कपन बस्ने २७ वर्षीय सुरेश ठाकुर हजाम छन्।
उनीहरूबाट प्रहरीले बा प्र. ०२-०४६ प ४८५२ नम्बरको मोटरसाइकल र तीन वटा मोबाइल बरामद गरेको छ।
जिल्ला प्रहरी परिसर काठमाडौंका एसपी अपिलराज बोहराका अनुसार पछिल्लो पटक वैशाख ५ गते बिहान पौने ४ बजेतिर काठमाडौंको बसुन्धारामा मोबाइल लुटपाट भएको थियो।
मोटरसाइकलमा आएका दुई जनाले एउटा ट्याक्सीलाई रोकेर ठमेलमा सामान लिन जाने भनेर साथीलाई फोन गर्नका लागि भनेर चालकसँग फोन मागेका थिए।
चितवन घर भएका प्रेम तामाङ बा २ ज ३४५८ नम्बरका ट्याक्सीका चालक थिए।
प्रेमले उनीहरूलाई मोबाइल फोन दिए। लगत्तै उनीहरू फोन लिएर मोटरसाइकलमा भागेका थिए।
यस्तै प्रकृतिको घटना गत चैतमा पनि भएको थियो।
चैत १७ गते धुम्बाराहीमा बा २ ज ९६७१ नम्बरको ट्याक्सी चालक कुलबहादुरको मोबाइल त्यसैगरी लुटेको अनुसन्धानबाट खुलेको छ। चैत १९ गते धुम्बाराहीबाटै बा २ ज ६३८० नम्बरका ट्याक्सी चालक राजकुमार तामाङको मोबाइल लुटेको खुलेको हो।
सोही राति साप्रेढुंगाबाट बा २ ज ४३०३ को ट्याक्सी चालक राजेशबहादुर बिसीको मोबाइल लुटेको आरोप उनीहरूमाथि छ। चाबहिलस्थित ओम अस्पताल नजिकै चैत २३ गते दुर्गा शाक्यको मोबाइल लुटेको आरोप छ।
प्रहरीले तीन जनामाथि जिल्ला अदालत काठमाडौंबाट म्याद थपेर अनुसन्धान अघि बढाएको छ। अदालतले पाँच दिन हिरासतमा राख्न अनुमति दिएको छ।
