हिजोआज सामाजिक सञ्जाल फेसबुकमा त्रिभुवन अन्तर्राष्ट्रिय विमानस्थलमा खिचेको एउटा भिडिओ भाइरल छ।
स्वदेश फर्किएका एक युवकमाथि प्रहरीले लछारपछार गरेको भिडिओमा देखिन्छ। प्रहरीको व्यवहारलाई लिएर सामाजिक सञ्जालमा आलोचना भइरहेको छ।
दुई तीन जना प्रहरीले ती युवकलाई हातमा समाएर आगमन कक्षभित्र लगेका थिए। प्रहरी हवल्दारले युवकको अनुहार र खुट्टामा प्रहार गरेको पनि भिडिओमा देखिन्छ।
यो भिडिओ खिचेका व्यक्तिले ती युवकलाई नपिट्न प्रहरीलाई आग्रह गरेको सुनिन्छ। दुई मिनेटको भिडिओमा ती युवकका श्रीमतीले श्रीमानमाथि कुटपिट नगर्न अनुरोधसमेत गरेकी छन्।
प्रहरीलाई छाड्न अनुरोध गरेपछि भने उनीहरू त्यहाँबाट हिँडेका थिए।
त्रिभुवन अन्तर्राष्ट्रिय विमानस्थलमा नेपाल प्रहरीको सुरक्षा कार्यालय गौचरनले सुरक्षा दिन्छ। कार्यालयका प्रवक्ता तथा एसपी लालध्वज सुवेदीका अनुसार यो घटना आइतबार बिहान साढे ११ बजेतिरको हो।
भिडिओ भाइरल बनेपछि प्रहरीले उनको विवरण बुझ्ने काम गरेको छ। सिसिटिभी फुटेज हेर्दा उनले माथिदेखि नै ‘लफडा’ गरेको उनले बताए।
‘उहाँको अटिट्युड पनि अर्कै रहेछ। हामीले सिसिटिभी हेर्यौं। उहाँले भन्सारकै कर्मचारीसँग पनि लफडा गर्नुभएको रहेछ,’ उनले भने, ‘हामीले डिटेल निकाल्दैछौं।’
बाहिर आएपछि ट्याक्सी चालकसँग पनि लफडा गरेपछि प्रहरीले नियन्त्रणमा लिएको उनले दाबी गरे।
‘ट्याक्सी पनि त्यो ठाउँमा आइरहेको देखिन्छ। ट्याक्सी चालकसँग पनि लफडा गरेका रहेछन्। त्यसपछि प्रहरीले नियन्त्रणमा लिएको हो। बाहिर सम्झाउँदा पनि नमानेपछि भित्र ल्याएको हो,’ उनले भने, ‘हामीले प्रहरीसँग पनि सोध्यौं, जुत्ताले पनि हान्न खोजेको देखिन्छ।’
प्रहरीले अध्यागमन विभागसँग सम्पर्क गरी ती व्यक्तिबारे विवरण निकाल्ने काम गरेको उनले बताए।
ती व्यक्ति मोरङ घर भई युएईमा मार्केटिङको काम गर्दै आएका सञ्जय ओझा हुन्।
उनी आफन्तको विवाह समारोहका लागि १० दिनको छुट्टि लिएर नेपाल आएका थिए। करिब १० महिनापछि उनी युएईबाट नेपाल आइपुगेका थिए।
आगमन कक्ष बाहिर ट्रली लिएर बसिरहँदा एक जना व्यक्ति आएर उनीसँग ट्याक्सीबारे सोध्न थालेको उनले बताए।
‘मलाई लिन आफन्त आउँदै थिए, ट्रली लिएर म कुरिरहेको थिएँ। एक जना मान्छे आएर ट्याक्सी चाहिएको हो भनेर सोध्नुभयो। मैले हैन आउँदैछन् मलाई लिन भनेँ,’ उनले सेतोपाटीसँग भने, ‘पहिले ट्रली राख्न मिल्थ्यो। अहिले १० महिनापछि आउँदा उनले यहाँ ट्रली राख्न मिल्दैन भनेर भने। उनले रूखो व्यवहार देखाउँदै मलाई गाली गर्न थाले।’
ती व्यक्तिले आफू विमानस्थलकै कर्मचारी भएको दाबी गरेको उनले बताए।
‘कर्मचारी भनेपछि मैले उहाँको आइडी देखाउनुस् भनेर भनेँ। त्यतिभन्दै गर्दा प्रहरी आएर मलाई गाली गर्न थालेका थिए। म आफ्नो देशमा आएको हो। म जाँदै नै छु भनेर भनेका थिए। जेब्रा क्रसिङ कटेपछि फेरि प्रहरीले गाली गर्दै आए,’ उनले भने।
त्यसपछि आफूले पनि मोबाइल निकालेर भिडिओ खिचेको उनले बताए। बाझाबाझ भएपछि प्रहरी र ट्राफिक प्रहरीले आफूलाई दुर्व्यहार गरी भित्र लगेर कुटेको उनले बताए।
उनले अधिकार नै नभएका ट्राफिक प्रहरीले आफ्नो हात बटार्दा अझै पनि दुखिरहेको बताए। त्यस्तै उनले आफ्नो ओठमा समेत चोट लागेको बताए।
‘पछि हल्ला नगर जा भनेर पठाइदिएको हो। त्यत्रो हुँदा पनि के भयो भनेर कुनै वरिष्ठ प्रहरीहरू आएनन्। ममाथि अपराधीलाई जस्तो व्यवहार गरियो,’ उनले भने, ‘ममाथि दुर्व्यहार भयो। भोलि अर्कोलाई पनि हुनसक्छ। आफ्नै देश आउँदा सुरक्षित महसुस भएन।’
भिडिओ:
-1744698177.jpg)
