युक्रेनी राष्ट्रपति भोलोदिमिर जेलेन्स्कीले कम्तीमा १५५ चिनियाँ नागरिकहरू रूसका तर्फबाट युक्रेनसँग लडिरहेको दाबी गरेका छन्।
साथै चीनले आफ्ना नागरिक रूसका लागि लड्न भर्ती भएको नदेखे जस्तो गरेको र युक्रेनविरूद्ध आक्रमणमा सहभागी हुन अनुमति दिएको आरोप समेत उनले लगाएका छन्।
यो साताको सुरूमा युक्रेनले दुई चिनियाँ लडाकू पक्राउ गरेकाबारे बोल्दै जेलेन्स्कीले पहिलो पटक आधिकारिक रूपमा चीनले रूसको तर्फबाट लड्न लडाकू पठाएको आरोप लगाएका हुन्।
बुधबार पत्रकारहरूसँग कुरा गर्दै जेलेन्स्कीले चीनले आफ्ना नागरिकलाई 'कुनै आदेश दिएको' थाहा नभए पनि आफ्ना जनता रूसी सेनामा सामेल भएको जानकारी चीन सरकारलाई पक्कै थाहा भएको दाबी गरे।
'हामीले यो रेकर्ड गरेका छौं कि उनीहरू (चीन) लाई यो थाहा थियो। हामीले रेकर्ड गरेका छौं कि यी चिनियाँ नागरिकहरू हुन्, उनीहरू हाम्रोविरूद्ध लडिरहेका छन्, युक्रेनको क्षेत्रमा युक्रेनीहरूको विरूद्ध हतियार प्रयोग गरिरहेका छन्। उनीहरूको प्रेरणा, पैसा हो वा होइन, राजनीति वा अन्य कुरा, मलाई अझै थाहा छैन। तर सो कुरा थाहा हुनेछ,' जेलेन्स्कीले भने।
उनले अझ धेरै चिनियाँ नागरिकहरू युक्रेनसँगको युद्धमा संलग्न रहेको पनि दाबी गरे।
युक्रेनी गुप्तचरले सार्वजनिक गरेको एउटा कागजातमा १९ देखि ४५ वर्ष उमेरका १३ चिनियाँ सैनिकहरूको तस्बिरसहित उनीहरूको राहदानी विवरण छ। त्यस्तै, दोस्रो कागजातमा नाम, जन्म मिति, उनीहरूको रूसी सैन्य एकाइ र केहीका हकमा उनीहरू कहाँ भर्ती भएका थिए भन्ने जानकारी सूचीबद्ध थियो।
चीनसँग व्यापार युद्धमा होमिएको अमेरिका चिनियाँ लडाकू युक्रेनसँग लडिरहेको समाचारले आश्चर्यचकित भएको हुनुपर्ने भन्दै जेलेन्स्कीले यो कुरा अमेरिकाका लागि पनि अस्वीकार्य हुनुपर्ने बताए।
चीनले भने चिनियाँ नागरिक आफै सामेल भएको भन्दै ठूलो संख्यामा युद्धमा संलग्न भएको दाबी पूर्ण रूपमा आधारहीन भएको बताएको छ।
चिनियाँ विदेश मन्त्रालयका प्रवक्ता लिन जियानले भने, 'चिनियाँ सरकारले सधै चिनियाँ नागरिकहरूलाई द्वन्द्व क्षेत्रबाट टाढा रहन, कुनै पनि रूपमा सशस्त्र द्वन्द्वमा संलग्न नहुन र विशेष गरी कुनै पनि पक्षको सैन्य कारबाहीमा भाग नलिन आग्रह गर्छ।'
चीनले आफूलाई यो युद्धमा तटस्थ पक्ष भएको बताए पनि रूसले हतियार बनाउन ठूलो मात्रामा चिनियाँ कच्चा पदार्थहरूको प्रयोग गरिरहेको पश्चिमा राष्ट्रले बताउँदै आएका छन्।
यसअघि २०२४ को अन्त्यतिर उत्तर कोरियाका १० हजारभन्दा बढी सैनिक रूसका तर्फबाट युक्रेनसँग लडेको खुलासा भएको थियो।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
