अछाममा एक दृष्टिविहीन युवतीको पेटमा सात महिनाको गर्भ रहेको पुष्टि भएपछि उनीमाथि बलात्कार भएको घटना बाहिरिएको छ।
दृष्टिविहीन युवतीमाथि बलात्कार गरेको आरोपमा प्रहरीले रामारोशन गाउँपालिका-५ का ५१ वर्षीय चेतमान रोकायालाई पक्राउ गरेको छ।
उनले २१ वर्षीया युवतीलाई असोजमा बलात्कार गरेको घटना युवतीको पेटमा २८ हप्ताको गर्भ रहेको पुष्टि भएपछि सार्वजनिक भएको हो।
जिल्ला प्रहरी कार्यालय अछामका प्रमुख इश्वरी भण्डारीका अनुसार पक्राउ परेका रोकाया पनि शारीरिक अपांगता भएका व्यक्ति हुन्। उनको दाहिने खुट्टा कृतिम छ। उनका पाँच छोरी र एक छोरा छन्।
प्रहरीको प्रारम्भिक अनुसन्धानका क्रममा रोकायाले विभिन्न प्रलोभन देखाएर युवतीमाथि बलात्कार गरेको खुलेको छ।
गत असोजमा जिल्ला अपांग संघको बैठकमा उनीहरूबीच भेट भएको थियो। सोही बैठकका क्रममा जिल्लाबाट सहायता दिलाइदिने त्यसबारे कुराकानी गर्नुपर्ने भनेर रोकायाले युवतीसँग मोबाइल नम्बर लिएका थिए।
त्यसै दिन रोकायाले युवतीलाई घुम्न जान प्रस्ताव गरेका थिए। त्यसपछि उनले सदरमुकाम मंगलसेनस्थित पालेवन सामुदाय वनभित्र पुर्याइ बलात्कार गरेको बयान गरेका छन् ।
पीडितको जाहेरीमा पनि सोही कुरा उल्लेख रहेको डिएसपी भण्डारीले बताए ।
उक्त घटनाबारे पीडितले कसैलाई भन्न नसकेको जाहेरीमा उल्लेख गरेकी छन्। बीचमा पटकपटक रोकायालाई सम्पर्क गर्न खोजे पनि फोन नउठाउने र बेवास्ता गर्ने गरेको बताएकी छन्।
पेट अस्वभाविक रूपमा बढ्न थालेपछि आफ्नो दाइलाई घटनाबारे सुनाएकी थिइन्। त्यसपछि अस्पताल लगेर चेकजाँच गराउँदा उनको पेटमा २८ हप्ताको गर्भ रहेको खुलेको प्रहरीले जनाएको छ।
पक्राउ परेका रोकायाले कसुर स्वीकार गरिसकेको र उनामाथि थप अनुसन्धान र कारबाही प्रक्रिया अगाडि बढाइएको डिएसपी भण्डारीले बताए।
पीडित युवतिलाई सुरक्षित आवास गृहको संरक्षणमा राखिएको डिएसपी भण्डारीले बताए ।
