जन्मकैद सजाय तोकिएका अपराधी १७ वर्षपछि पक्राउ परेका छन्।
पर्सा विन्दवासिनी गाउँपालिका-२ का ६२ वर्षीय लोकनाथ साह तेली पक्राउ परेका हुन्।
उनलाई केन्द्रीय अनुसन्धान ब्युरोको टोलीले सोमबार पर्साको वीरगञ्जबाट पक्राउ गरेको हो।
उनीमाथि २०६९ कात्तिक २४ गते सर्वोच्च अदालतले साविक मुलकी ऐन, ज्यानसम्बन्धी महलको १३(१) बमोजिम सर्वस्वसहित जन्म कैद ठहरको फैसला सुनाएको अनुसन्धान ब्युरोका प्रहरी उपरीक्षक (एसपी) सुधिराज शाहीले जानकारी दिए।
उनले २०६४ वैशाख २५ गते पर्सा साविक बहुअर्वाभाठा भा गाविस वडा-५ बस्ने ढोडा मुखिया विनलाई जग्गासम्बन्धी विवादको विषयमा छलफल गर्ने भनी बोलाएर हत्या गरेका थिए।
'हत्यापछि फरार रहेका उनी झण्डै दुई दशकपछि पक्राउ परेका हुन्,' एसपी शाहीले भने।
उनी भारतको पिपरियास्थित रहेको रामजानकी मन्दिरमा पुजारीको भेषधारण गरी लुकीछिपी बसेका छन् भन्ने सूचनाको आधारमा प्रहरीले अनुसन्धान अगाडि बढाएको थियो। उनी त्यहाँ १० वर्ष बसेको प्रहरी अनुसन्धानमा खुलेको एसपी शाहीले बताए।
