अमेरिकी राष्ट्रपति डोनाल्ड ट्रम्पले गत बुधबार भन्सार युद्ध सुरू गरेपछि संसारभरि सेयर बजारमा आइरहेको भारी गिरावटलाई औषधिसँग तुलना गरेका छन्।
ट्रम्पले नयाँ भन्सार नीति अनुसार सबै व्यापारिक साझेदार देशहरूलाई १० प्रतिशत भन्सार शुल्क लगाउने घोषणा छन्।
प्रतिस्पर्धीहरूलाई भने रेसिप्रोकल (जबाफी) महसुल लगाउने घोषणा गरेका छन्। अरू देशले अमेरिकी उत्पादनमा लगाए जति नै भन्सार लगाउने भनेर उनले रेसिप्रोकल महसुल घोषणा गरेका हुन्।
उनले आठ वटा देशहरूलाई ४० प्रतिशतभन्दा बढी भन्सार शुल्क निर्धारण गरेका छन् भने मुख्य प्रतिस्पर्धी चीनलाई ३४ प्रतिशत अनि भारतलाई २७ प्रतिशत भन्सार शुल्क निर्धारण गरेका छन्।अमेरिकासँग घनिष्ठ सम्बन्ध भएको युरोपियन युनियनलाई पनि २० प्रतिशत भन्सार लगाएका छन्।
ट्रम्पले चीनको उत्पादनमा थप ३४ प्रतिशत भन्सार लगाउने निर्णयको शुक्रबार चीनले जबाफ दिएपछि विश्वका सबभन्दा दुई ठूला अर्थतन्त्रहरू बीचको व्यापार युद्ध झन् चर्किने देखिएको छ।
ट्रम्पको बुधबारको घोषणाका कारण बिहीबारदेखि नै विश्व बजारमा गिरावट आउन थालेकोमा शुक्रबार चीनले जबाफी कदम घोषणा गरेपछि बजार झन् ओह्रालो लाग्यो।
शुक्रबार बन्द भएका एसियाका सेयर बजार सोमबार खुलेपछि पनि गिरावट कायमै रह्यो। अमेरिकामा पनि लगानीकर्ताले सोमबार व्यापक रूपमा सेयर बेच्ने र सेयर बजार झन् तल झर्ने अपेक्षा गरिएको छ।
यस्तोमा ट्रम्पले भने उनको नीति र सो नीतिका कारण बजारमा आएको उथलपुथललाई औषधिसँग तुलना गरेका छन्।
'म केही पनि घटोस् भन्ने चाहन्नँ। तर कहिलेकाहीँ केही निको पार्न औषधि खानुपर्छ,' ट्रम्पले आइतबार राष्ट्रपतिको हवाईजहाज ‘एयर फोर्स वानमा’ पत्रकारहरूलाई भने, 'बजारमा के हुन्छ, म तपाईंलाई भन्न सक्दिनँ। तर हाम्रो देश धेरै बलियो छ।'
अरूसँग सौदा गर्दा आफ्नो हात माथि परोस् भनेर आफूले जानाजानी यस्तो स्थिति सिर्जना नगरेको उनले दाबी गरे। अर्थतन्त्रका लागि भन्सार नै समाधान भएको आफ्नो दाबी दोहोर्याए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
यो पनि:
ट्रम्पको भन्सार युद्धले आइफोनको भाउ २ हजार ३ सय डलर पुग्न सक्ने!
ट्रम्पले भन्सार युद्ध सुरू गरेपछि तेलको भाउमा भारी गिरावट
