शुक्रबार राति जाजरकोट केन्द्रविन्दु भएर तीन मिनेटको फरकमा दुइटा भुइँचालो गएका बेला एक व्यक्ति आत्तिएर घरबाट हाम फाल्दा घाइते भएका छन्।
जिल्ला प्रहरी प्रमुख डिएसपी प्रमेश विष्टका अनुसार जिल्लाको त्रिवेणी गाउँपालिका–९ पेउघाका १६ वर्षीय खुम्बु बिक घरबाट हाम फालेका थिए। उनको खुट्टा भाँचिएको छ।
एम्बुलेन्सबाट खुम्बुलाई जिल्ला अस्पताल ल्याउने तयारी रहेको प्रहरीले बताएको छ।
त्यस्तै भूकम्पका कारण पेउघाका प्रदीप सार्कीको घर चर्किएको खबर आएको डिएसपी विष्टले बताए।
जाजरकोटका प्रहरी प्रमुख डिएसपी पुरूषोत्तम न्यौपानेले भूकम्पबाट जिल्लामा हालसम्म कुनै पनि मानवीय क्षतिको विवरण प्राप्त नभई सकेको बताए।
'अहिलेसम्म कुनै पनि मानवीय क्षति भएको विवरण आएको छैन,' डिएसपी न्यौपानेले भने, 'हामीले अस्पतालमा पनि बुझ्यौं। अहिलेसम्म घाइते आएको विवरण छैन।’
भुइँचालोका कारण विभिन्न ठाउँबाट घरहरू चर्किएको विवरण भने आइरहेको उनले बताए। छोटो अवधिका भुइँचालो पटक पटक आएपछि मानिसहरू घरबाहिर निस्किएर खुला स्थानमा बसेको पनि उनले बताए।
भेरी नगरपालिका-२ रिसाइकी एक महिला पनि भुइँचालोपछि आत्तिएर भाग्दा घाइते भएकी छन्। डिएसपी न्यौपानेका अनुसार उनको छातीमा चोट लागे पनि अवस्था गम्भीर छैन। भर्खरै अस्पताल ल्याएर उनको उपचार सुरू गरिएको छ।
भुइँचालोपछि राति नै जिल्ला विपद् व्यवस्थापन समितिको बैठक बसेको उनले जानकारी दिए।
त्यस्तै, छिमेकी जिल्ला सल्यानका प्रहरी प्रमुख डिएसपी केशर न्यौपानेले पनि हालसम्म जिल्लामा कुनै पनि क्षतिको विवरण आइनसकेको बताए। हालसम्म एउटा घर चर्किएको भन्ने खबर आएको उनले जानकारी दिए।
शुक्रबार बेलुकी ८ बजेर ७ मिनेट जाँदा पहिलो भूकम्प ५.२ म्याग्निच्युडको गएको थियो। लगत्तै ८ बजेर १० मिनेट जाँदा ५.५ म्याग्निच्युडको भूकम्प गएको थियो।
