अमेरिकी राष्ट्रपति डोनाल्ड ट्रम्पले विभिन्न देशबाट आयात हुने वस्तुमा बुधबार थप भन्सार दर घोषणा गरेपछि व्यापार युद्ध सुरू भएर विश्व अर्थतन्त्र र बजारलाई नै असर गर्ने देखिएको छ।
नयाँ भन्सार नीति अनुसार सबै व्यापारिक साझेदार देशहरूलाई १० प्रतिशत भन्सार शुल्क लगाउने घोषणा उनले गरेका हुन्।
प्रतिस्पर्धीहरूलाई भने रेसिप्रोकल (जबाफी) महसुल लगाउने घोषणा गरेका छन्। अरू देशले अमेरिकी उत्पादनमा लगाए जति नै भन्सार लगाउने भनेर उनले रेसिप्रोकल महसुल घोषणा गरेका छन्।
ठ्याक्कै अरू देशले आफ्ना उत्पादनमा लगाए जति महसुल नलगाए पनि उनले अमेरिकाको व्यापार घाटा भएको देशहरूलाई उच्च भन्सार दर लगाएका छन्।
उनले आठ वटा देशहरूलाई ४० प्रतिशतभन्दा बढी भन्सार शुल्क निर्धारण गरेका छन् भने मुख्य प्रतिस्पर्धी चीनलाई ३४ प्रतिशत अनि भारतलाई २७ प्रतिशत भन्सार शुल्क निर्धारण गरेका छन्।अमेरिकासँग घनिष्ठ सम्बन्ध भएको युरोपियन युनियनलाई पनि २० प्रतिशत भन्सार लगाएका छन्।
ट्रम्पको बुधबारको घोषणापछि नै विश्वभरी सेयर बजारमा गिरावट आएको छ।
भारत लगायत केही देशले ट्रम्पलाई थप नचिढ्याउने भनेर जबाफी कदम नचाल्ने अपेक्षा गरिएको छ। तर युरोपियन युनियनले जबाफी कदम चाल्न तयारी गरिरहेको छ भने चीनले भर्खरै अमेरिकी उत्पादनमा हाल कायम रहेको भन्सार दरमाथि थप ३४ प्रतिशत भन्सार लगाएको छ।
लगानी बैंक जेपी मोर्गनले विश्व अर्थतन्त्र सन् २०२५ को अन्त्यसम्म मन्दीमा जाने सम्भावना बढेर ६० प्रतिशत पुगेको भनेको छ।
यसरी ट्रम्पले विदेशी उत्पादनमा लगाएको भन्सार र अरू देशले चाल्ने जबाफी कदमा कारण अरू देशमा मात्रै नभएर अमेरिकामै समेत आर्थिक संकट आउने अनुमान विज्ञहरूले गर्न थालेका छन्।
ट्रम्पले भन्सारलाई वार्तामा प्रयोग गर्न मिल्ने हतियारका रूपमा लिने गरेकाले यी महसुल स्थायी हो वा अस्थायी अझै स्पष्ट छैन।
तर यसले तत्कालका लागि अमेरिकी जनताका लागि प्रायजसो सबै उपभोग्य वस्तु महँगो पार्नेछ। बढेको महसुल लागु हुनुअघि नै अमेरिकामा उपभोक्ताले रासन लगायत अरू उपभोग्य वस्तुको भण्डार गर्न पसलमा भिड लाग्न थालेको समाचारहरू आएका छन्।
यसै क्रममा आइफोन बनाउने एप्पल कम्पनीले बढेको लागत उपभोक्तामाथि थोपर्यो भने महँगो मोडलको आइफोनको मूल्य अमेरिकी उपभोक्ताका लागि करिब २३०० डलर पुग्न सक्ने भनेर रोजेनब्लाट सेक्युरिटीजको हवाला दिँदै रोयटर्सले लेखेको छ।
हाल आइफोन १६ प्रो म्याक्स मोडलको १ टिबी स्टोरेज भएको फोनको रकम अमेरिकामा करिब १,६०० डलर पर्छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
