सल्यानमा गुडिरहेको गाडीको ढोकाबाट लडेका एक यात्रुको मृत्यु भएको छ।
मृत्यु हुनेमा सुर्खेतको सिम्ता गाउँपालिका– ५ का २८ वर्षीय गणेश बुढा छन्।
सल्यानका प्रहरी प्रवक्ता प्रहरी निरीक्षक बाबुराम बस्नेतका अनुसार बुढा बिहीबार साँझ ६ बजे कर्णाली प्रदेश ०२००१ ख ०७९० को फोर्स गाडीको ढोकामा झुन्डिएर यात्रा गरिरहेका थिए।
छिन्चु –जाजरकोट सडक खण्ड अन्तरगत सल्यानको बनगाड कुपिन्डे नगरपालिका – १ बाङगिरा पुगेपछि गाडीको ढोकाबाट लडेका थिए। गाडी बाँकेको नेपालगन्ज हुँदै सुर्खेतको गोजीबजार जाँदै थियो।
लडेर गम्भीर घाइते भएका उनलाई उपचारका लागि सुर्खेतको मेहलकुना अस्पताल पुर्याउनासाथ चिकित्सकले मृत घोषणा गरेको प्रहरी निरीक्षक बस्नेतले बताए।
चालक सुर्खेतको सिम्ता गाउँपालिका – ५ का ४३ वर्षीय जिवराज गिरीसहित गाडी इलाका प्रहरी कार्यालय देवस्थलको नियन्त्रणमा छन् ।
घटनाबारे थप अनुसन्धान हुने प्रहरीले जनाएको छ ।
