हाल देशमा स्थानीय र पश्चिमी वायुको सामान्य प्रभाव छ।
जल तथा मौसम पूर्वानुमान महाशाखाका अनुसार शुक्रबार बिहान कोशी, मधेस, बागमती र गण्डकी प्रदेशका पहाडी भूभागमा आंशिक बदलीको अवस्था छ। बाँकी भूभागहरूमा मौसम मुख्यतया सफा रहेको छ।
काठमाडौंमा बिहीबार बिहानको तुलनामा अहिले भिजिबिलिटी बढी रहेको मौसमविद् प्रतिभा मानन्धरले जानकारी दिइन्।
'बिहीबार काठमाडौंको भिजिबिलिटी न्यूनतम १ हजार थियो। बुधबार १५ सय पुगेको थियो,' उनले भनिन्,'अहिले २५ सय छ।'
अब विस्तारै खुल्दै जाने पनि मानन्धरले जानकारी दिइन्। आज हिजोभन्दा अलि सुधार भए पनि त्यसले पनि प्रदूषण भने नहट्ने उनले बताइन्।
काठमाडौं तीन दिनदेखि प्रदूषित छ। दूषित हावाले काठमाडौंको आकाश ढपक्कै ढाकेको छ।
भिजिबिलिटी कमजोर हुँदा त्रिभुवन अन्तर्राष्ट्रिय विमानस्थलमा उडान अवरूद्ध भएका छन्।
पानी नपरेको र हावा पनि तीव्र गतिमा नचलेका कारण काठमाडौंको तुवाँलो फाट्न नसकेको मौसमविद महर्जनले बताइन्।
'वर्षा नभएसम्म यस्तै रहन सक्छ। यो हप्ता वर्षा हुने सम्भावना छैन। अर्को साताको मध्यतिर चाहीँ सम्भावना देखिएको छ,' उनले भनिन्।
वर्षा नहुनु र त्यस्ता प्रणाली नआउनुको कारण पश्चिम बंगालको तलतिर विकसित भएको उच्चचापीय प्रणाली पनि हो।
'अहिले त्यो प्रणाली स्थिर भएर बसिरहेको छ। त्यसले गर्दा पानी पार्ने प्रणालीहरू आउँदैनन्। त्यसकारण अहिले हावा नचलेको र वर्षा पनि नभएको अवस्था हो। अलि बेगको हावा चलेको भए सफा हुन्थ्यो,' मौसमविद मानन्धरले भनिन्।
अहिले भारततिरबाट अर्को प्रणाली पनि नेपाल आउँदै गरेको उनले बताइन्।
'भारततिर त्यसको प्रभाव छ। नेपाल आउँदासम्म कतिको प्रभाव हुन्छ हेर्न बाँकी नै छ,' उनले भनिन्।
शुक्रबार दिउँसो कोशी, गण्डकी र कर्णाली प्रदेशको हिमाली भूभागका एक दुई स्थानमा हल्का हिमपात हुने सम्भावना छ।
शुक्रबार देशका कुनैपनि भूभागमा वर्षाको सम्भावना नरहेको मौसविद महर्जनले जानकारी दिइन्।
-1743574561.jpg)
