सन् २०२५ को वर्ल्ड ह्याप्पिनेस रिपोर्टमा नेपाल दक्षिण एसियामै सबभन्दा खुसी देशका रूपमा दरिएको छ।
अमेरिकी संस्था ग्यालपले गरेको सर्वेक्षणले कुन देशका जनता कति खुसी छन् भन्ने आधारमा देशहरूको वरियताक्रम निर्धारण गरेको हो।
संयुक्त राष्ट्रसंघको प्रायोजनमा तयार पारिएको यो रिपोर्टमा जनतालाई जीवनको गुणस्तर कस्तो छ भनी ० देखि १० सम्म अंक दिएर मूल्यांकन गर्न लगाइएको थियो।
हरेक व्यक्तिलाई ० देखि १० सम्म ११ वटा खुड्किला भएको सिँढी अनुमान गर्न लगाएर उक्त सर्वेक्षण गरिएको थियो। सबभन्दा टुप्पोको १०औं खुड्किलोले सबभन्दा खुसी र तलको ० खुड्किलोले सबभन्दा दु:खी भन्ने बुझाउँथ्यो। यसै आधारमा आफ्नो जीवन कुन खुड्किलोमा छ जस्तो लाग्छ भनेर मूल्यांकन गर्न लगाइएको थियो।
हरेक देशबाट सरदर एक हजार जनालाई सामेल गरिएको यो सर्वेक्षणमा संसारभरिका एक लाखभन्दा बढी सहभागी रहेको रिपोर्टमा उल्लेख छ।
गत मार्च २० मा सार्वजनिक गरिएको रिपोर्टअनुसार नेपाल दक्षिण एसियामै सबभन्दा खुसी देश ठहरिएको छ।
कुल १४७ देशमा गरिएको सर्वेक्षणमा नेपालीहरूले औसतमा आफ्नो जीवनलाई ५.३१ अंक दिएका छन्। नेपाल सूचीको ९२औं स्थानमा छ। त्यसपछि पाकिस्तान ४.७७ अंकसहित १०९औं स्थानमा छ भने भारत ४.३९ अंकसहित ११८औं, श्रीलंका ३.८९ अंकसहित १३३औं, बंगलादेश ३.८५ अंकसहित १३४औं र अफगानिस्तान १.३६ अंकसहित १४७ औं स्थानमा छ।
अफगानिस्तान रिपोर्टकै सबभन्दा पुछारमा छ भने आफै 'ग्रस नेसनल ह्याप्पिनेस इन्डेक्स' निकाल्ने भुटानलाई भने ग्यालपको यो सर्वेक्षणमा समावेश नै गरिएको थिएन। दक्षिण एसियाकै माल्दिभ्स पनि सर्वेक्षणमा सामेल थिएन।
यो वर्ष फिनल्यान्ड सरदर ७.७४ अंकसहित पहिलो स्थानमा रह्यो भने डेनमार्क ७.५२ अंकसहित दोस्रो, आइसल्यान्ड ७.५१ अंकसहित तेस्रो, स्वीडेन ७.३४ अंकसहित चौथो र नेदरल्यान्ड्स ७.३१ अंकसहित पाँचौं स्थानमा छ।
त्यस्तै, कोस्टा रिका (७.२७), नर्वे (७.२६), इसराइल (७.२३), लक्जमबर्ग (७.१२) र मेक्सिको (६.९८) क्रमश: छैठौंदेखि १० औं स्थानमा छन्।
विश्वको सबभन्दा ठूलो अर्थतन्त्र भएको र सबभन्दा शक्तिशाली अमेरिका ६.७२ अंकसहित २४औं स्थानमा छ भने अमेरिकाको मुख्य प्रतिस्पर्धी चीन ५.९२ अंकसहित ६८औं स्थानमा छ।
1674377848-1743699941.jpeg)
