कटारी नगरपालिका–४ मा भएको दुर्घटनामा एक जनाको मृत्यु भएको छ।
बिहीबार मदन भण्डारी राजमार्गअन्तर्गत कटारी–४ को सडकखण्डमा मोटरसाइकलले साइकललाई ठक्कर दिँदा सिन्धुलीको दुधौली नगरपालिका–५ घारीथुन्सीका ७१ वर्षका अम्बर सुनुवारको मृत्यु भएको हो।
कटारी–६ गेरूवाका २३ वर्षीय अनन्त मगर प्र २–०१–०० ३२ प ५४२२ नम्बरको मोटरसाइकल चलाएर कटारीबाट दुधौली सिन्धुलीतर्फ जाँदै थिए। अम्बर साइकलमा विपरीत दिशाबाट कटारीतर्फ आउँदै थिए।
मोटरसाइकलले ठक्कर दिँदा गम्भीर घाइते भएका अम्बरको कटारी अस्पतालमा ल्याइ उपचार गरिँदै थियो। सोही क्रममा दिउँसो ४ः३० बजे मृत्यु भएको इलाका प्रहरी कार्यालय कटारीका प्रमुख प्रहरी नायब उपरीक्षक कमल बजगाईंले बताए।
उनका अनुसार मोटरसाइलमा पछाडि सवार कटारी–५ भुल्केका २२ वर्षीया सरिना मगर सामान्य घाइते भएकी छिन्। उनको कटारी अस्पतालमा उपचार गरिएको थियो।
अनन्त र सरिनालाई मोटरसाइकलसहित प्रहरी नियन्त्रणमा राखिएको छ। घटनाबारे थप अनुसन्धान भइरहेको प्रहरीले जनाएको छ।
