बर्दियाको बारबर्दिया नगरपालिकाका प्रमुख प्रशासकीय अधिकृत दीपककुमार आचार्यविरूद्ध दायर मुद्दा फिर्ता भएको छ।
बिहीबार दिउँसो प्रहरी प्रशासन समक्ष मदिराले मातेको बेला गल्ती हुन गएको तथा फेरि यस्तो गल्ती नदोहोर्याउने प्रतिबद्धतासहित आचार्यले मेयर, उपमेयरसँग माफी मागेपछि कुरा मिलेको हो।
जिल्ला प्रहरी प्रमुख एसपी केदार खनालका अनुसार बिहीबार प्रमुख प्रशासकीय अधिकृत आचार्यले प्रहरी प्रशासनका समक्ष मेयर, उपमेयरका साथै उपस्थित सबैका सामु गल्ती भएको भन्दै माफी माग्दै एक पटकलाई क्षमा दिन गरेको आग्रह अनुसार उपमेयर पाण्डेले मुद्दा फिर्ता लिएकी हुन्।
बुधबार उपमेयर रत्नकुमारी पाण्डेले प्रमुख प्रशासकीय अधिकृतकाविरूद्ध जिल्ला प्रहरी कार्यालयमा अभद्र व्यवहारसम्बन्धी उजुरी दिएकी थिइन्।
मंगलबार दिउँसै मदिराले मातेर कार्यालयमा आएर उपद्रो व्यवहार गरेका आचार्यको ज्यादतीविरूद्ध बुधबारको कार्यपालिका बैठकले मुद्दा चलाउने निर्णय गरेको थियो।
प्रमुख प्रशासकीय अधिकृत आचार्यले सार्वजनिक रूपमै माफी मागेका छन्।
बिहीबार दिउँसो आफ्नो सामाजिक सञ्जालमा स्ट्याटस लेख्दै यसअघि आफूले सामाजिक सञ्जालमा लेखेका कुराहरू गलत भएको भन्दै आफै खण्डन गर्दै माफी मागेका छन्।
मंगलबार दिउँसै मदिराले मातेर कार्यालयमा आएर उपमेयरको कार्यकक्षमा प्रवेश गरी झैझगडामा उत्रिएपछि प्रमुख प्रशासकीय अधिकृत आचार्यसहित तीन जना कर्मचारीलाई प्रहरीले नियन्त्रणमा लिएको थियो।
मापसे जाँचमा प्रमुख प्रशासकीय अधिकृतको मात्रै मापसे पुष्टि भएको थियो।
सोही साँझ बेलुकी नै प्रहरीले प्रमुख प्रशासकीय अधिकृतसहित तीनै जनालाई रोहबरमा छाडेको थियो।
प्रहरीले पक्राउ गरेपछि पनि मदिराले मातेका प्रमुख प्रशासकीय अधिकृत आचार्यले आफ्नो सामाजिक सञ्जालमा स्ट्याटस लेख्दै मेयर छबिलाल थारूले पावर टिलर खरिदमा ठेकेदारसँग पाँच लाख नपाएको झोंकमा आफूमाथि हर्कत गरिएको दोष लगाएका थिए।
उनी आगामी वैशाख १४ गते अनिवार्य अवकासमा जाँदैछन्।
सम्बन्धित समाचार:
मदिराले मातेका प्रमुख प्रशासकीय अधिकृतले कार्यालयमै झगडा गरेपछि...
मापसे गरी कार्यालयमा झगडा गर्ने प्रमुख प्रशासकीय अधिकृतविरूद्ध उपमेयरले दिइन् उजुरी
गल्ती गरेको भन्दै प्रमुख प्रशासकीय अधिकृतले सार्वजनिक रूपमै मागे माफी
मापसे गरी कार्यालयमा झगडा गर्ने प्रमुख प्रशासकीय अधिकृतविरूद्ध मुद्दा चलाउने निर्णय
