बाँके राष्ट्रिय निकुञ्जको खड्गवार हात्तीसारमा 'गणेशगज' नामक मकुना हात्तीको आक्रमणबाट एक जना माउतेको घटनास्थलमै मृत्यु भएको छ।
बर्दिया जिल्लाको ठाकुरबाबा नगरपालिका –९ घर भई बाँकेको खड्गवार हात्ती सारमा फनिक पदमा कार्यरत ४५ वर्षीय आशाराम थारूको घटनास्थलमै मृत्यु भएको हो।
कोहलपुर नगरपालिका–१३ स्थित खड्गवार हात्तीसारमा बुधबार बेलुकी साढे ८ बजेतिर दाना र घाँस दिन गएका थारूमाथि पहिला सुँडले तानेर कुल्चिएर मारेको बाँके राष्ट्रिय निकुञ्जका वरिष्ठ संरक्षण अधिकृत वीरेन्द्र कँडेलले सेतोपाटीलाई बताए।
‘बुधबार बेलुकी दाना र घाँस दिन गएका आफ्नै स्याहारमा खटिँदै आएका थारूमाथि गणेशगज नामक मकुना हात्तीले एकाएक आक्रमण गरेको थियो,’ कँडेलले भने, ‘आक्रमण भएको देखेपछि हात्तीसारमै काम गर्ने अरू साथीहरू दौडिएर जाँदाजाँदै उसले ज्यान लिइसकेको थियो।’
मकुनाको आक्रमणबाट २० सेकेन्डको अन्तरालमै थारूको ज्यान गएको हुँदा अरू कर्मचारी दौडिएर गए पनि कुनै उपाय नचलेको उनले बताए।
२०६३ चैत ६ गते जन्मिएको १८ वर्षको गणेशगज नामक मकुना हात्ती विगतदेखि नै आशाराम थारूले माउतेका रूपमा रेखदेख गर्दै आएका थिए।
थारूले सोही वर्ष बर्दियाबाट गणेशगजलाई बाँकेस्थित हात्तीसारमा ल्याएर स्याहार गर्दै आएका थिए।
निकुञ्जका वरिष्ठ संरक्षण अधिकृत कँडेलका अनुसार यही भाले हात्तीले २०७९ सालमा कृष्ण उपाध्यायमाथि पनि आक्रमण गरी घाइते तुल्याएइको थियो। अन्य केहीमाथि पनि गणेशगजले आक्रमणका प्रयास थुप्रै गरेको कँडेलले बताए।
कँडेलका अनुसार भर्खरै जवानी चढ्दै गरेका भाले हात्तीमा मदका कारण फरक व्यवहार र उग्रता हुन सक्छ। मद चढ्दा उनीहरूमा पोथी हात्तीसँग मिलनको चाहना हुने गर्छ। जसले गर्दा फरक व्यवहार र उग्र बन्न सक्छ। आशारामलाई त्यो कुरा सम्झाइएको पनि थियो। आशारामले सावधानी अपनाउँदा अपनाउँदै पनि जवानी चढ्दै गरेको गणेशगजले आफ्नै स्याहार सुसारमा खटिँदै आएका थारूमाथि मद चढेकै कारण उग्रता प्रदर्शन गरेको कँडेलले बताए।
कँडेलले १८ वर्षको गणेशगज हात्ती सारमै भएको बताए। उसलाई अब दानापानी कम गरिने उनले बताए।
‘हामी अब उसलाई घाँस, दाना पानी कम गर्नेर्छौं,’ कँडेलले भने, ‘अब केही समय उसलाई चराउन पनि लगिने छैन।’
थारूको शव पोष्टमर्टमका लागि नेपालगञ्ज मेडिकल कलेज शिक्षण अस्पताल, कोहलपुरमा लगिएको छ।
पोष्टमर्टमपछि परिवारलाई शव बुझाइने कँडेलले बताए।
कँडेलका अनुसार थारूको राहतको प्रक्रियाको काम सुरू हुनेछ। निकुञ्जको नियम अनुसार उनको परिवारले राहतस्वरूप दश लाख प्राप्त गर्नेछन्। त्योबाहेक जीवन बीमा बापतको रकम पनि पाउने छन्।
