काठमाडौंको कोटेश्वरमा भाटभटेनी सुपरमार्केटतर्फ जानेक्रममा चलाएको गोली लागेर रेबिका खत्री र दिनेश खत्रीलाई गोली लागेको प्रहरीले बताएको छ।
बुधबार प्रहरीले गरेको पत्रकार सम्मेलनमा रेबिका खत्री र दिनेश खत्रीलाई किन गोली हानियो? भनेर पत्रकारले प्रश्न गरेका थिए।
त्यस विषयमा केन्द्रीय प्रवक्ता एवं डिआइजी दिने आचार्यले प्रहरी फोर्स कोटेश्वर जानका लागि गल्ली हुँदै गएको र गोली चलाउनुपर्ने अवस्था आएको बताए।
‘रेबिका खत्री र दिनेशलाई गोली लागेकोमा उपचार भइरहेको छ। कोटेश्वरको भाटभटेनी लुटपाट भइरहेको समय अन्दाजी ५ बजेतिरको हो। त्यहाँ लुटपाटको घटना भएको थियो। मानिसहरू भएको अवस्था थियो,’ उनले भने, ‘त्यहीँनिर तलपट्टि गाडी जलाएको थियो। प्रहरीले त्यसलाई नियन्त्रणमा लिन गोली चलाएको अवस्था हो। त्यसक्रममा उहाँको तिघ्रानिर गोली लागेको हो।’
यस विषयमा अझै अनुसन्धान भइरहेको पनि उनले बताए। सिसिटिभी फुटेज लगायत अन्य फुटेजको माध्यमबाट पनि घटनाबारे बुझ्ने काम भइरहेको उनले बताए।
उनका अनुसार त्यसदिन गोली लागेर २० जना घाइते भएका छन्। १३ जना अझै उपचाररत छन्। कोटेश्वर बहुमुखी क्याम्पसमा व्यवस्थापन संकायमा स्नातक तेस्रो वर्ष पढिरहेकी रेबिका आन्दोलनमा गएकी थिइनन्। उनी उदयपुर चौदण्डीगढी नगरपालिका-६ की हुन्। उनीसँगै उनका माइला बुवाका छोरा दिनेशलाई पनि गोली लागेको हो। गोली लागेर घाइते भएका दिनेश मंगलबार डिस्चार्ज भएका छन्।
यो पनि: राजावादीको प्रदर्शन छल्न भित्री बाटो हिँडेका रेबिका र दिनेशले छल्न सकेनन् गोली
