दिउँसै मदिराले मातेर कार्यालयमा आएर झैझगडा गरेका प्रमुख प्रशासकीय अधिकृतविरूद्ध मुद्दा लिएर उपमेयर प्रहरीकहाँ पुगेकी छन्।
बर्दियाको बारबर्दिया नगरपालिकाका प्रमुख प्रशासकीय अधिकृत दीपककुमार आचार्यविरूद्ध उपमेयर रत्नकुमारी पाण्डेले जिल्ला प्रहरी कार्यालयमा पुगेर अभद्र व्यवहारसम्बन्धी उजुरी दिएकी हुन्। यद्यपि उजुरी दर्ता भने भएको छैन। त्यस्तै मेयर छविलाल थारुले आचार्यविरूद्ध बिहीबार साइबर क्राइमसम्बन्धी मुद्दा दिने भएका छन्।
जिल्ला प्रहरी प्रमुख एसपी केदार खनालले उपमेयर आएर बुधबार दिउँसो प्रमुख प्रशासकीय अधिकृतविरूद्ध अभद्र व्यवहारसम्बन्धी सार्वजनिक मुद्दा दिएर गएको बताए।
‘मेयर/उपमेयर आएर प्रमुख प्रशासकीय अधिकृतविरूद्ध मुद्दा दिएर जानु भएको छ,’ उनले भने, ‘आज सुरक्षा समितिको बैठक पनि भएको हुँदा म अलि व्यस्त भएँ।’
बिहीबार प्रमुख प्रशासकीय अधिकृत आचार्य समेतलाई बोलाएर छलफल गर्ने र सकभर मेलमिलापमार्फत झगडा मिलाउन प्रयास गर्ने कि भन्ने सल्लाह भएको एसपी खनालले बताए।
‘भोलि एक पटक प्रमुख प्रशासकीय अधिकृतलाई बोलाएर उहाँको धारणा बुझ्छौं,’ उनले भने, ‘के कसरी मेलमिलाप गराउन सम्भव हुन्छ भन्ने ढंगले प्रयास हुनेछन्।’
सबैका धारणा बुझेर मात्रै मुद्दा दर्ता हुने एसपी खनालले बताए।
‘उहाँका बीचमा कुरा मिल्ने अवस्था देखिएन भने स्वत: मुद्दा दर्ता हुन्छ,’ उनले भने, ‘आज मैले आफै उपमेयरको मुद्दा बुझेको हुँ, त्यो एक हिसाबले दर्ता भए समान हो।’
एसपी खनालले प्रमुख प्रशासकीय अधिकृत आचार्यलाई खोज्नका लागि प्रहरी खटाइएको पनि बताए।
‘उहाँ सम्पर्कमा आउनु भएको छैन,’ एसपी खनालले भने।
मंगलबार दिउँसो मदिराले मातेर कार्यालयमा पुगेका आचार्य उपमेयर पाण्डेको कार्यकक्षमा गई झैझगडा गर्नुका साथै उदण्ड व्यवहार देखाएका थिए। त्यसपछि मेयर थारूले प्रहरीलाई खबर गरेपछि उनी पक्राउ परेका थिए। बेलुका मात्रै आचार्यसहित तीन जना कर्मचारी आफन्तको जिम्मामा छोडिएको थियो। आचार्य वैशाख १४ गते अनिवार्य अवकासमा जाँदैछन्।
त्यो घटनापछि बुधबार बसेको कार्यपालिका बैठकले प्रमुख प्रशासकीय अधिकृतले गल्ती गरेको भन्दै कानुनी कारबाहीका लागि मुद्दा दायर गर्ने निर्णय गरेको थियो।
यी पनि:
मदिराले मातेका प्रमुख प्रशासकीय अधिकृतले कार्यालयमै झगडा गरेपछि...
मापसे गरी कार्यालयमा झगडा गर्ने प्रमुख प्रशासकीय अधिकृतविरूद्ध मुद्दा चलाउने निर्णय
