काठमाडौंको टोखाबाट बरामद भएको २५ करोड रुपैयाँ बराबरको विदेशी मुद्राका मालिकको नाम राजश्व अनुसन्धान विभागले पहिचान गरेको छ।
सिन्धुपाल्चोकको भोटेकोशी गाउँपालिका वडा नम्बर ४ घर भई काठमाडौंको टोखा नगरपालिका वडा नम्बर १० महादेवटार हाइट बस्दै आएका नारायण पौडेल उक्त विदेशी मुद्राका मालिक रहेको खुलेको राजश्व अनुसन्धान विभागका महानिर्देशक चण्डीप्रसाद घिमिरेले बताए।
‘तथ्य प्रमाणले उक्त विदेशी मुद्राका मालिकको नाम पहिचान भएको छ, तर मान्छे फरार भएकाले वारेन्ट जारी भएको छ,’ उनले भने।
गत चैत ४ गते राति काठमाडौं उपत्यका अपराध अनुसन्धान कार्यालयको टोलीले टोखाको झोरबाट नारायणी प्रदेश-७ ख १६५२ नम्बरको ट्रक र चालक कुशाङ लामासहितलाई नियन्त्रण लिएको थियो।
गाडीभित्र जाँच गर्दा फल्सबटम बनाएर २५ करोड बराबरको विदेशी मुद्रा बरामद भएको थियो।
१३ लाख ७५ हजार १५० युरो र ३ लाख २० हजार ८५० डलर बरामद भएको थियो। कार्यालयले यसको अनुसन्धान गर्न विभागमा पठाएको थियो।
उक्त रकम बोक्ने कुशाङ भरियामात्रै भएको र कसको रकम हो भन्नेबारे चासोको विषय बनेको थियो। अनुसन्धानकै क्रममा विभागले मालिकको पहिचान गरेको हो।
विभागले पौडेलको घर, कारोबारस्थल र गोदामहरूमा पनि तलासी लिएको थियो। चालक कुसाङ लामाले रकम लैजानुअघि फोनमा पौडेलसँग कुराकानी गरेका थिए।
‘नारायण पौडैल तस्करीमा संलग्न मानिस हुन्, हामीले उनलाई पक्राउ गरिसकेका छैनौं। तथ्यले विदेशी मुद्राको मालिक उनै हो भन्ने खुल्छ, ठूलै केस भएकाले आज हामीले डिस्क्लोज गर्यौं,’ महानिर्देशक घिमिरेले भने।
विभागले ग्यारेज, पार्किङ स्थलमा पुगेर पनि अनुसन्धान गरेको जनाएको छ। कुशाङ लामाको बैंक खाताको विवरणबाट पनि अस्वभाविक शंकास्पद कारोबार भएको देखिएको जनाएको छ।
नारायण पौडेल भने अहिले मोबाइल अफ गरेर फरार छन्।
को हुन् नारायण पौडेल?
सिन्धुपाल्चोकका नारायण पौडेल विवादित पृष्ठभूमिका व्यक्ति हुन्। उनका चार दाजुभाइ छन्। उनी माहिलो हुन्।
दाजुभाइहरू राजनीतिक पृष्ठभूमिकै व्यक्तिसमेत रहेको खुलेको छ। जेठो ध्रुव पौडेल नेकपा (एमाले) मा आवद्ध छन्। उनी एक पटक फुल्पिङकट्टीका गाविस अध्यक्षसमेत भएका थिए।
साइलो बच्चु हिमालय सीमा व्यापार संघका पूर्वअध्यक्ष भइसकेका व्यक्ति हुन्। कान्छो राजकुमार पौडेल भोटेकोशी गाउँपालिकाका अध्यक्षसमेत भइसकेका व्यक्ति हुन्। उनी २०७४ मा नेकपा (माओवादी केन्द्र) बाट अध्यक्ष बनेका थिए।
उनले २०७९ को चुनावमा पनि प्रतिस्पर्धा गरेका थिए। तर उनी नेपाली कांग्रेसका उम्मेदवारसँग पराजित भएका थिए।
एक जना प्रहरी अधिकृतका अनुसार चार जना दाजुभाइकै आपराधिक पृष्ठभूमि देखिन्छ।
‘उनीहरू चारै जनाको पृष्ठभूमि आपराधिक देखिन्छ। रक्तचन्दन, सुन, विदेशी मुद्रा अपचलन (हुण्डी) मा संलग्न भएको देखिएको हो,’ ती अधिकृतले भने, ‘अहिले नाम आएका नारायणको पनि पृष्ठभूमि त्यस्तै खालको हो।’
नारायण यसअघि विदेशी मुद्रा अपचलनकै कसुरमा पक्राउ परी धरौटीमा रिहा भएका थिए।
पक्राउ गर्नुअघि नै नाम सार्वजनिक हुँदा प्रहरीको असन्तुष्टि
अनुसन्धानकै क्रममा रहेका व्यक्तिलाई सार्वजनिक गरेको भन्दै प्रहरी अधिकृतहरू असन्तुष्ट देखिएका छन्। नाम सार्वजनिक गरेपछि प्रतिवादी भाग्न सक्ने भन्दै प्रहरीले आपत्ति जनाएको हो।
‘उनी पक्राउ परेका छैनन् तर ती मान्छेको विवरण किन सार्वजनिक गरियो?,’ एक प्रहरीले भने, ‘यसरी सार्वजनिक गर्नुको उद्देश्य के हो? सार्वजनिक गरेपछि आरोपी भाग्दैनन् त?’
-1742286205-copy-1743596006.jpg)
